సింహాచలం ఆషాడ పౌర్ణమి: గిరి ప్రదక్షిణ మొదలు, 10 లక్షల మంది భక్తుల హాజరు అంచనా

సింహాచలం లోని శ్రీ సింహాద్రి అప్పన్న స్వామి ఆలయంలో ఆషాడ పౌర్ణమి సందర్భంగా గిరి ప్రదక్షిణ మధ్యాహ్నం 2:30 గంటలకు ప్రారంభమైంది. ఈ ఏడాది 5 నుంచి 10 లక్షల మంది భక్తులు ఈ ప్రదక్షిణలో పాల్గొంటారని అధికారులు అంచనా వేస్తున్నారు.

32 కిలోమీటర్ల గిరి ప్రదక్షిణ మార్గంలో భక్తుల కోసం ప్రతి 2 కిలోమీటర్లకు విరామ స్థలాలు, 28 చోట్ల తాగునీటి సౌకర్యం, వైద్య శిబిరాలు, అంబులెన్సులు ఏర్పాటు చేశారు. కొబ్బరికాయలు కొట్టేందుకు 120 స్టాండ్లను సిద్ధం చేశారు.

పోలీస్ బందోబస్తు నిమిత్తం 18 డ్రోన్ కెమెరాలతో నిఘా, కమాండ్ కంట్రోల్ రూమ్ ఏర్పాటు చేశారు. విశాఖ సిటీ పోలీస్ కమిషనర్ డాక్టర్ సంకాబ్రత బాక్సీ ఆధ్వర్యంలో భారీ స్థాయిలో పోలీసులు మోహరించారు.

ఇది ఆలయ సంప్రదాయంలో భాగం. నాలుగో విడత చందన సమర్పణ ఆషాడ పౌర్ణమి రోజు తెల్లవారుజామున జరగ్గా, తర్వాత గిరి ప్రదక్షిణకు శ్రీకారం చుట్టారు. ఆలయ అనువంశిక ధర్మకర్త పూసపాటి అశోక్ గజపతి రాజు కొబ్బరికాయ కొట్టి ప్రారంభించారు. గత సంవత్సరం సుమారు 10 లక్షల మంది భక్తులు ఈ ఉత్సవంలో పాల్గొన్నారు.

ఇప్పటికే 70 వేల మంది భక్తులు తొలిపావంచ వద్ద కొబ్బరికాయ కొట్టి ప్రదక్షిణ ప్రారంభించారు. సాయంత్రానికి భక్తుల సంఖ్య మరింత పెరిగే అవకాశం ఉంది.