సిరిసిల్ల, పెద్దపల్లి గ్రామాల్లో క్షుద్ర పూజల దృశ్యాలు: స్థానికుల్లో భయం

సిరిసిల్ల, పెద్దపల్లి, సుల్తానాబాద్ మండలాల పలు గ్రామాల్లో రోడ్డు మధ్యలో కుంకుమ, పసుపు, అన్నం, కోడిగుడ్డు, నాటుకోడి వంటివి పెట్టి వెళ్లిపోయే దృశ్యాలు కనిపిస్తున్నాయి. దీంతో స్థానికులు, వాకర్స్, పాఠశాల విద్యార్థులు భయపడుతున్నారు.

నాలుగైదు రోజుల క్రితం సిరిసిల్ల సమీపంలోని ఒక చెరువు వద్ద మూడు బజార్ల ప్రాంతంలో ఇలాంటి దృశ్యాలే కనిపించాయి. పసుపు, కుంకుమ, అన్నం, కోడిగుడ్డు పెట్టి గుర్తుతెలియని వ్యక్తులు వెళ్లిపోయారు. అటు వెళ్లే వాకర్స్, స్థానికులు భయానికి గురయ్యారు.

సుమారు 20 రోజుల క్రితం పెద్దపల్లి సమీపంలో ఒక చెట్టుకు బొమ్మను కట్టివేసిన ఘటన కూడా జరిగింది. గుర్తుతెలియని వ్యక్తులు ఈ పని చేసినట్టు తెలుస్తోంది. దాదాపు 10 గంటల పాటు అక్కడ భయం నెలకొంది. స్థానికులే ధైర్యం చేసి బొమ్మను కిందికి తీసి తగలబెట్టారు.

సుల్తానాబాద్ మండలంలోని పలు గ్రామాల్లో ఆదివారాలు వచ్చినప్పుడు ఇలాంటి దృశ్యాలు కనిపిస్తుంటాయి. కుంకుమ, పసుపు, కోడిగుడ్లు, నాటుకోడి పెట్టి వెళ్లిపోతుంటారు. దీంతో రైతులు, వాకర్స్ బయటికి వెళ్లాలంటే భయపడుతున్నారు. అమావాస్య రోజు కూడా ఈ దృశ్యాలు ఎక్కువగా కనిపిస్తున్నాయని స్థానికులు చెబుతున్నారు. బాందేరు వాగు సమీప గ్రామాల్లో, కొరుట్ల–మెట్‌పల్లి ప్రాంతాల్లోనూ ఇలాంటి ఘటనలు వెలుగులోకి వచ్చాయి.

నెల రోజుల క్రితం ఒక మండలంలో బండరాయికి తాలి కట్టిన దృశ్యం కూడా బయటపడింది. దీంతో ఆ దారిలో చాలామంది వెళ్లలేకపోయారు. అప్పుడు అధికారులు వచ్చి స్థానికులకు అవగాహన కల్పించారు.

ఇంట్లో ఎవరైనా దీర్ఘకాలంగా అనారోగ్యంతో ఉంటే "మీకు ఎవరో చేశారు" అని చెప్పి ఈ తరహా పూజలు చేసినట్టు నటిస్తున్నారని జన విజ్ఞాన వేదిక సభ్యులు చెబుతున్నారు. ఇలాంటి మంత్రాలు, చేతబడులు ఉండవని, ఇవన్నీ అపోహలే అని వారు పేర్కొంటున్నారు. భయపెట్టి డబ్బులు లాక్కోవడమే కొందరి లక్ష్యమని వారు అంటున్నారు. ప్రతి గ్రామంలో అవగాహన సదస్సులు నిర్వహించాలని, ప్రజలను తప్పుదారి పట్టించే వారిపై కఠిన చర్యలు తీసుకోవాలని జన విజ్ఞాన వేదిక డిమాండ్ చేస్తోంది. స్థానికులు కూడా ఇలాంటి పదార్థాలు పెట్టిన వారిపై చర్యలు తీసుకోవాలని కోరుతున్నారు. కొన్ని ప్రాంతాల్లో అధికారులు ఇప్పటికే అవగాహన సదస్సులు నిర్వహిస్తున్నారు.