భోజనం తర్వాత వెంటనే పడుకోవడం ఆరోగ్యానికి మంచిది కాదు: వైద్యులు

భోజనం చేసిన వెంటనే పడుకోవడం ఆరోగ్యానికి హానికరమని వైద్యులు హెచ్చరిస్తున్నారు. ఇలా చేయడం వల్ల రక్తంలో షుగర్ లెవెల్స్ బాగా పెరిగిపోతాయని చెబుతున్నారు.

తిన్న తర్వాత 15 నుంచి 20 నిమిషాల పాటు నడవడం వల్ల రక్తంలో చక్కెర స్థాయిలు 20 నుంచి 30 శాతం వరకు తగ్గుతాయని, ఇన్సులిన్ సామర్థ్యం మెరుగవుతుందని, జీర్ణవ్యవస్థ సరిగ్గా పనిచేస్తుందని వైద్యులు వివరిస్తున్నారు. తిన్న వెంటనే పడుకుంటే జీర్ణ సమస్యలు వస్తాయని, దీర్ఘకాలంలో డయాబెటిస్, అధిక రక్తపోటు (BP), ఊబకాయం వంటి వ్యాధులు వచ్చే ప్రమాదం ఉందని హెచ్చరిస్తున్నారు.

చాలా మంది బరువు తగ్గడానికి జిమ్ కి వెళ్తూ, డైట్ పాటిస్తారు. కానీ భోజనం అయిన వెంటనే పడుకోవడం అనే చిన్న అలవాటు వల్ల వారి ప్రయత్నం వృధా అవ్వొచ్చని వైద్యులు సూచిస్తున్నారు. ఎంత బిజీగా ఉన్నా భోజనం తర్వాత కాసేపు నడవడం మంచి అలవాటు అని సలహా ఇస్తున్నారు.