మహాకాళేశ్వర్ ఆలయంలో దక్షిణ భారత వంటకాలతో కొత్త ప్రసాదం

ఉజ్జయినీలోని ప్రసిద్ధ మహాకాళేశ్వర జ్యోతిర్లింగ ఆలయంలో ఇక నుంచి ప్రతి మంగళవారం, శుక్రవారం దక్షిణ భారతీయ వంటకాలు ఉచిత ప్రసాదంగా అందించనున్నారు. ఆలయ అన్నక్షేత్రంలో ఇప్పటికే ప్రతిరోజు భక్తులకు ఉచిత భోజన ప్రసాదం అందిస్తున్నారు. తాజా నిర్ణయంతో దక్షిణాది రాష్ట్రాల నుంచి వచ్చే వేలాది భక్తులకు మరింత సౌకర్యం కలగనుంది.

మధ్యప్రదేశ్ ముఖ్యమంత్రి మోహన్ యాదవ్ సూచన మేరకు ఆలయ నిర్వాహకులు ఈ ఏర్పాటు చేశారు. దేశ విదేశాల నుంచి లక్షలాది భక్తులు మహాకాళేశ్వరుని దర్శనానికి వస్తుంటారు. ఈ క్రమంలో దక్షిణ భారత భక్తుల అనుకూలత దృష్ట్యా ఈ నిర్ణయం తీసుకున్నారు. ఈ ప్రసాదంలో ఇడ్లీ, దోశ వంటి దక్షిణాది వంటకాలు ఉంటాయని అధికారులు తెలిపారు.

ప్రతి మంగళవారం, శుక్రవారం ఈ ప్రత్యేక వంటకాలు అందుబాటులో ఉంటాయి. నేటి నుంచే ఈ కొత్త ప్రసాదం ప్రారంభమైంది.