శ్రీకృష్ణ జననం – అర్ధరాత్రి వేళ అవతార విశేషాలు

పురాణాల ప్రకారం శ్రీకృష్ణుడు శ్రావణ మాసం కృష్ణపక్షం అష్టమి నాడు అర్ధరాత్రి జన్మించాడు. దక్షిణాయణం, శ్రావణ మేఘావృత ఆకాశం, కృష్ణపక్ష చీకటి, అష్టమి తిథి అన్నీ కలిసిన సమయం సంవత్సరంలోనే అత్యంత కటిక చీకటి అని భక్తులు భావిస్తారు. ఆ చీకటి నుంచి వెలుగులోకి తీసుకెళ్లడానికే తాను వచ్చానని కృష్ణుడు భగవద్గీతలో సూచించాడని ప్రవచనకారులు వివరిస్తున్నారు.

పోతన ఆంధ్ర మహాభాగవతం ఈ అవతార ఘట్టాన్ని సవివరంగా పేర్కొంది. ఆ శ్లోకం ప్రకారం బాలకృష్ణుడు శంఖ, చక్ర, గద, పద్మాలతో నాలుగు చేతులు కలిగి పీతాంబరం మూర్తీభవించినట్లు వర్ణించారు. వైడూర్య రత్నాల కిరీటం, కుండలాలు, శ్రీవత్స చిహ్నం, కౌస్తుభమణి, కేయూరాలతో సంపూర్ణ దివ్యరూపంగా వసుదేవుడు దర్శించాడు.

సంప్రదాయ కథనం ప్రకారం వసుదేవుడు ఆ శిశువును గుండెలమీద ఎత్తుకుని యమునా నది దాటడానికి వచ్చాడు. వరద ప్రవాహం ఉగ్రంగా ఉన్నా కృష్ణుడు ఛాతీపై ఉన్నంత సేపు నది చీలి దారి ఇచ్చింది. త్రేతాయుగంలో రామునికి సముద్రం దారి ఇచ్చిన విధంగానే ఇది జరిగిందని భాగవతం పోలుస్తుంది. కృష్ణుడిని హృదయంలో నిలుపుకుంటే జనన మరణ సాగరం దాటవచ్చునన్న ఆధ్యాత్మిక సందేశమిది.

ప్రస్తుతం ఈ అవతార తత్వం జగన్నాథుడి స్వరూపంలో కొనసాగుతోందని భక్తులు విశ్వసిస్తారు. అర్ధరాత్రి రాసలీల కోసం పరిగెత్తిన గోపికల వలె కాకుండా ఇప్పుడు ఎవరు ప్రేమతో జగన్నాథుడిని దర్శించినా పాప నివృత్తి కలుగుతుందని ఈ ప్రసంగం వివరించింది.