శ్రీకాళహస్తి ఆలయంలో ప్రసాదం గదిలో అగ్నిప్రమాదం.. ఎవరికీ గాయాలు లేవు

శ్రీకాళహస్తి ఆలయంలోని దక్షిణ గోపురం పక్కన ఉన్న ప్రసాదం తయారీ గదిలో అగ్నిప్రమాదం జరిగింది. ఈ ఘటనలో ఎవరికీ గాయాలు కాలేదని అధికారులు తెలిపారు.

సమయంలో గదిలో ఆరుగురు సిబ్బంది పని చేస్తున్నారు. మంటలు రాగానే వారు వెంటనే బయటకు వచ్చేశారు. గదిలో ఉన్న గ్యాస్ సిలిండర్లను బయటకు తరలించారు. విద్యుత్ సరఫరాను నిలిపివేశారు.

షార్ట్ సర్క్యూట్ వల్లే ఈ ప్రమాదం జరిగి ఉంటుందని పోలీసులు, ఆలయ అధికారులు భావిస్తున్నారు. ఈ ఘటనపై ఇప్పటివరకు ఎలాంటి ప్రాథమిక నివేదిక రాలేదని అధికారులు చెప్తున్నారు. ఆలయ అధికారి (EO) మాట్లాడుతూ ప్రమాదానికి కారణం షార్ట్ సర్క్యూట్ అని తెలిపారు.

ప్రసాదం తయారీలో ఎక్కువగా నెయ్యి వాడుతుంటారు. దీంతో గోడలు, కిటికీలపై నెయ్యి జిడ్డు పేరుకుపోయి ఉంది. దాని వల్ల మంటలు వేగంగా వ్యాపించాయని అధికారులు భావిస్తున్నారు. ఆలయం కొండకు ఆనుకుని ఉండడంతో పైకప్పుపై ఎండిన ఆకులు కూడా ఉన్నాయి. అవి కూడా మంటల తీవ్రత పెంచాయి.

మంటలు, పొగ చూసిన భక్తులు భయపడి బయటకు పరుగులు తీశారు. ఆలయం సమీపంలోని దుకాణాలను వెంటనే ఖాళీ చేయించారు. ఫైర్ ఇంజిన్లు చేరుకుని మంటలను అదుపులోకి తీసుకొచ్చాయి. ప్రస్తుతం పరిస్థితి పూర్తిగా అదుపులో ఉందని అధికారులు తెలిపారు.

దక్షిణ గోపురం పక్కన ఇటీవలే కొత్త ప్రసాదం తయారీ గదిని ఏర్పాటు చేశారని, అక్కడ విద్యుదీకరణ పనులు కూడా ఇటీవలే జరిగాయని అధికారులు చెప్పారు. ప్రమాదానికి అసలు కారణం ఏంటి, మళ్లీ ఇలాంటి ఘటన జరగకుండా ఏ చర్యలు తీసుకోవాలి అనేది ఆలయ సిబ్బంది, పోలీసులు పరిశీలిస్తున్నారు.