స్వాతంత్య్ర దినోత్సవానికి ముందు ఢిల్లీలో భారీ ఉగ్రదాడి మాక్ డ్రిల్

ఆగస్టు 15 స్వాతంత్య్ర దినోత్సవానికి ముందు దేశ రాజధాని ఢిల్లీలో ఉగ్రదాడి హెచ్చరికల నేపథ్యంలో భారీ మాక్ డ్రిల్ నిర్వహించారు. 'సుదర్శన్ శక్తి-5' పేరుతో 17 గంటల పాటు ఈ అభ్యాసం జరిగింది. NSG, ఢిల్లీ పోలీస్, ఇండియన్ ఆర్మీ, NDRF, CISF, BCAS, DMRC, ఫైర్ సర్వీసెస్, ఫోరెన్సిక్ విభాగం, క్యాట్స్ అంబులెన్స్, ఆరోగ్య శాఖ తదితర భద్రతా సంస్థలు ఈ కసరత్తులో పాల్గొన్నాయి. ఎర్రకోట, IGI విమానాశ్రయం, మెట్రో, ఆస్పత్రులు, మాల్స్, ప్రార్థనా స్థలాలు వంటి కీలక ప్రాంతాల్లో పేలుళ్లు, కాల్పులు, బందీల పరిస్థితి, విమాన హైజాక్ తరహా దాడులతో పాటు ఏకకాలంలో బహుళ ఉగ్రవాద దృశ్యాలు సిమ్యులేట్ చేశారు. దాడి సన్నద్ధతను పరీక్షించే ఈ అభ్యాసం ద్వారా నగరంలో పెను విపత్కర పరిస్థితిని ఎదుర్కొనే యంత్రాంగాన్ని మెరుగుపరచుకున్నారు. స్వాతంత్య్ర దినోత్సవం రోజు రాజధానిలో కట్టుదిట్టమైన భద్రతా ఏర్పాట్లు అమలు కానున్న నేపథ్యంలో ఈ మాక్ డ్రిల్ మరింత ప్రాధాన్యత సంతరించుకుంది.