హయత్ నగర్‌లో యువకుడి హత్య: స్నేహితుల ప్రమేయంగా పోలీసుల ప్రాథమిక నిర్ధారణ

రంగారెడ్డి జిల్లా హయత్ నగర్‌లో సుహాస్ అనే యువకుడు హత్యకు గురైన ఘటనలో అతని స్నేహితుల ప్రమేయం ఉన్నట్టు పోలీసులు ప్రాథమికంగా నిర్ధారించారు. బుధవారం రాత్రి ఇంటి నుంచి పిలిచి తీసుకెళ్లి గ్రామ శివార్లలో దాడి చేసి చంపినట్టు సమాచారం.

రాకేష్, పరశురాం, మరో ఇద్దరు కలిసి సుహాస్‌ను రాత్రి పూట బయటికి పిలిచారు. తల్లి వారించినా వినకుండా అతను వెళ్లాడు. నిందితులు అతనిపై దాడి చేసి, అర కిలోమీటర్ వరకు వెంబడించి, ప్రైవేట్ భాగాలపై దాడి చేసి హత్య చేశారని పోలీసులు తెలిపారు. మృతదేహాన్ని స్మశాన వాటిక సమీపంలో పడేసి పరారయ్యారు.

దర్యాప్తులో సుహాస్ ఇటీవల గంజాయికి బానిస కావడం, సరఫరా వ్యవహారాల్లో ఉండటం వెల్లడైంది. గతంలో స్నేహితుల్లో ఒకరి స్నేహితురాలితో అసభ్యకర చాటింగ్ జరిగిన విషయం కక్షకు దారితీసి ఉండొచ్చని భావిస్తున్నారు. యువతి, ఆర్థిక వివాదాలు, గంజాయి లావాదేవీలు వంటి కోణాల్లో దర్యాప్తు కొనసాగుతోంది.

పోలీసులు కేసు నమోదు చేసి నిందితుల కోసం గాలింపు చర్యలు చేపట్టారు. మృతుని తల్లి, సోదరి పసుమామలలో నివసిస్తుండగా, సుహాస్ గతంలో సికింద్రాబాద్‌లో పెడదోవ పట్టడంతో తల్లి ఇక్కడికి తీసుకొచ్చినట్టు తెలిసింది. హత్యకు గల కారణాలపై పూర్తి వివరాలు వెల్లడి కావాల్సి ఉంది.