సుల్తానాబాద్‌లో ప్రమాద హాట్‌స్పాట్లలో 3D పోలీస్ వాహన నమూనాలు ఏర్పాటు

పెద్దపల్లి జిల్లా సుల్తానాబాద్ మండలంలో రహదారి ప్రమాదాల నియంత్రణ కోసం పోలీసులు వినూత్న చర్యలు చేపట్టారు.

సీఐ రంజిత్ రావు, ఎస్ఐ చంద్రకుమార్ ఆధ్వర్యంలో రాజీవ్ రహదారిపై రెండు ప్రమాదకర ప్రదేశాల్లో 3D రేడియం పోలీస్ ఇన్నోవా వాహన నమూనాలు ఏర్పాటు చేశారు. నారాయణపూర్ క్రాస్ రోడ్, ఎస్ఆర్ఎస్పి కెనాల్ దగ్గర ఈ నమూనాలు ఇరువైపులా కనిపిస్తాయి.

రాత్రిపూట లేదా వేగంగా వచ్చే వాహనదారులు దూరం నుంచే ఈ నమూనాలను పోలీస్ వాహనంగా భావించి వేగం తగ్గిస్తారని, అప్రమత్తంగా నడపడం వలన ప్రమాదాలు తగ్గుతాయని అధికారులు పేర్కొన్నారు.

ఇది కాకుండా అదే జాతీయ రహదారిపై రంబుల్ స్ట్రిప్స్, సీసీ కెమెరాలు ఏర్పాటు చేశారు. వాహనదారులకు పోలీసులు చేసిన విజ్ఞప్తిలో వేగం తగ్గించాలని, మద్యం సేవించి డ్రైవింగ్ చేయవద్దని, సరైన డ్రైవింగ్ నైపుణ్యం లేకపోయినా లైసెన్స్ లేకుండా వాహనాలు నడపవద్దని కోరారు. ప్రమాదాలు నివారించడానికి తాము అన్ని ప్రయత్నాలు చేస్తున్నామని, ప్రజలు సహకరించాలని సూచించారు.