సూపర్ ఎల్నో 2026: సముద్రాలు ఎందుకు వేడెక్కుతున్నాయి? భారత్‌పై ప్రభావం ఏమిటి?

ప్రపంచవ్యాప్తంగా వాతావరణం అత్యంత ప్రమాదకరంగా మారుతోంది. ఊహించని స్థాయిలో ఉష్ణోగ్రతలు పెరుగుతున్నాయి. 1950 తర్వాత ఎన్నడూ చూడని విధంగా సూపర్ ఎల్నో ముప్పు ముంచుకొస్తోందని వాతావరణ శాస్త్రవేత్తలు హెచ్చరిస్తున్నారు.

ఆస్ట్రేలియా బ్యూరో ఆఫ్ మెటీరియాలజీ విడుదల చేసిన సదర్న్ హెమిస్పియర్ మానిటరింగ్ నివేదిక ప్రపంచ దేశాలను తీవ్ర ఆందోళనకు గురిచేస్తోంది. పసిఫిక్ మహాసముద్రంలో ఉష్ణోగ్రతలు రోజురోజుకూ పెరుగుతున్నాయి. సెంట్రల్ ట్రాపికల్ పసిఫిక్ ప్రాంతంలో ఉష్ణోగ్రతలు ఎల్నో డేంజర్ మార్క్‌లను దాటేశాయి. తాజా ఎల్నో 3.4 ఇండెక్స్ విలువ రికార్డు స్థాయిలో 1.24 డిగ్రీల సెల్సియస్‌కు చేరుకుంది. కేవలం గత రెండు వారాల్లోనే ఉష్ణోగ్రతల్లో 0.3 డిగ్రీల సెల్సియస్ పెరుగుదల స్పష్టంగా కనిపించింది.

రాబోయే నెలల్లో పసిఫిక్ ప్రాంతం మరింత వేడెక్కుతుందని గ్లోబల్ మోడల్స్ అంచనా వేస్తున్నాయి. సముద్రంపై గాలుల తీవ్రత పెరగడం, మేఘాల కదలికల్లో అసాధారణ మార్పులు రావడం ఎల్నో పరిస్థితులను సూచిస్తున్నాయి. కనీసం ఈ ఏడాది చివరి వరకైనా ఎల్నో ప్రభావం కొనసాగుతుందని నివేదిక వెల్లడించింది.

భారత్‌కు సంబంధించి ఒక సానుకూల అంశం కనిపిస్తోంది. ప్రస్తుతం ఇండియన్ ఓషన్ డైపోల్ న్యూట్రల్‌గా ఉన్నప్పటికీ రాబోయే రోజుల్లో ఇది పాజిటివ్‌గా మారే అవకాశం ఉంది. గత నెలలో IOD ఇండెక్స్ -0.02 డిగ్రీల సెల్సియస్ వద్ద నమోదైంది. సదర్న్ హెమిస్పియర్ వింటర్ స్ప్రింగ్ సీజన్లో పాజిటివ్ IOD ఏర్పడవచ్చని మోడల్స్ చెప్తున్నాయి. పాజిటివ్ IOD వల్ల అరేబియా సముద్రం నుంచి భారత ఉపఖండం వైపు తేమతో కూడిన గాలులు తీవ్రంగా వీస్తాయి. దీని కారణంగా ఎల్నో సంవత్సరంలో కూడా భారత్‌లో మెరుగైన రుతుపవన వర్షాలు పడే అవకాశం బలంగా ఉంటుందని నిపుణులు తెలిపారు.

కేవలం పసిఫిక్ మాత్రమే కాకుండా ప్రపంచవ్యాప్తంగా సముద్రాలు విపరీతంగా వేడెక్కుతున్నాయి. 1900 నుంచి లెక్కలు చూసుకుంటే 2026 మే నెలలో నమోదైన సముద్ర ఉష్ణోగ్రతలే అత్యధికంగా ఉన్నాయి. Copernicus క్లైమేట్ చేంజ్ సర్వీస్ డేటా ప్రకారం జూన్ 21న సముద్ర ఉపరితల ఉష్ణోగ్రతలు 20.86 డిగ్రీలకు చేరాయి.

సముద్రాలు వేడెక్కడం వల్ల వాతావరణం మరింత వేడిగా మారుతుంది. తుఫాన్లకు మరింత శక్తి లభించడం, తీవ్రస్థాయి వర్షాలు, వరదలు తలెత్తుతాయి. మంచు వేగంగా కరగడం వల్ల సముద్ర మట్టాలు పెరగడంతో పాటు సముద్ర జీవజాలం తీవ్ర ఒత్తిడికి గురవుతుందని నిపుణులు ఆందోళన వ్యక్తం చేస్తున్నారు.