రెండో పెళ్లి పుకార్లపై సురేఖ వాణి స్పందన: 'ప్రస్తుతానికి అలాంటి ఆలోచన లేదు'

నటి సురేఖ వాణి తన రెండో పెళ్లి గురించి మీడియాలో వస్తున్న వార్తలను ఖండించారు. ఓ మల్టీలింగ్వల్ సినిమా ప్రెస్ మీట్‌లో ఆమె ఈ వివరణ ఇచ్చారు.

తన కుమార్తె, నటి సుప్రీత ఇటీవల ఒక ఇంటర్వ్యూలో 'అమ్మ సంతోషంగా ఉండటం కోసం నేను ఏదైనా చేస్తా' అని చెప్పిన మాటలను కొందరు రెండో పెళ్లి చేసుకుంటుందని అర్థం చేసుకున్నారని సురేఖ వాణి చెప్పారు. 'నా అమ్మాయికి పెళ్లి వయసు వచ్చింది. నేనేం పెళ్లి చేసుకుంటాను? ప్రస్తుతానికి, భవిష్యత్తులోనూ అలాంటి ఆలోచన లేదు' అని స్పష్టం చేశారు.

ప్రెస్ మీట్‌లో భాగంగా ఆమె నటిస్తున్న కొత్త చిత్రం గురించి మాట్లాడారు. మిస్సింగ్ కేసుల నేపథ్యంతో తెరకెక్కుతున్న ఈ థ్రిల్లర్ చిత్రం తెలుగుతో పాటు తమిళ్, కన్నడ, మలయాళ భాషల్లో విడుదల కానుంది. ఈ సినిమాలో తాన్య హోప్ కూడా నటిస్తున్నారు.

తెలుగు నటీనటులకు ఇతర భాషా చిత్రాల్లో అవకాశాలు తగ్గుతున్నాయన్న అభిప్రాయంపై సురేఖ వాణి స్పందించారు. 'నటులు ఏ భాషకైనా చెందినవారైనా, ఎక్కడ పనిచేసినా తప్పు లేదు. మన వాళ్లకు కూడా ఎక్కువ అవకాశాలు వస్తే బాగుంటుంది' అని అన్నారు.