రెండో పెళ్లిపై నటి సురేఖ వాణి స్పందన : ప్రస్తుతానికి ఆలోచన లేదు

నటి సురేఖ వాణి తన రెండో పెళ్లి గురించిన వార్తలపై స్పందించారు. ప్రస్తుతానికి రెండో వివాహం చేసుకునే ఆలోచన లేదని స్పష్టం చేశారు. "నా కూతురు సుప్రీతకు ఇప్పుడు పెళ్లి వయసు వచ్చింది. నేను ఎందుకు పెళ్లి చేసుకుంటాను" అని ఆమె అన్నారు.

సోషల్ మీడియాలో తనపై వచ్చే ట్రోల్స్ గురించి కూడా మాట్లాడారు. "ఒకప్పుడు పట్టించుకునేదాన్ని. కానీ ఇప్పుడు పట్టించుకోవడం మానేశాను. నాకు ఏది కావాలంటే అది పోస్ట్ చేస్తాను. అది నా ఇష్టం" అని తెలిపారు.

తన కెరీర్ గురించి మాట్లాడుతూ, సినిమాల్లో అవకాశాలు తగ్గాయని చెప్పారు. "ప్రతి ప్రెస్ మీట్‌లో దర్శకులను, నిర్మాతలను ఆవిడకు ఎందుకు పాత్రలు ఇవ్వట్లేదు అని అడగండి" అని చమత్కరించారు. అయితే తాను టీవీ, ఓటీటీ, చిన్న తెర, పెద్ద తెర ఏదైనా సిద్ధంగా ఉన్నానని, అవకాశాల కోసం ఎదురు చూస్తున్నానని చెప్పారు.

కూతురు సుప్రీత కెరీర్ నిర్ణయాల గురించి సురేఖ వాణి మాట్లాడుతూ, "కథలు వింటాను, నా అభిప్రాయం చెబుతాను. కానీ చివరి నిర్ణయం తనదే" అని చెప్పారు. సురేఖ వాణి తెలుగు చిత్రాల్లో క్యారెక్టర్ నటిగా, టీవీ హోస్ట్‌గా ప్రసిద్ధి. 'రెడీ' లాంటి చిత్రాల్లో నటించారు.