22A నిషేధిత భూముల జాబితాపై గందరగోళం: విశ్రాంత జాయింట్ కలెక్టర్ ఆరోపణ

విశ్రాంత జాయింట్ కలెక్టర్ సురేష్ పొద్దా 22A నిషేధిత భూముల జాబితా నిర్వహణలో రెవెన్యూ అధికారుల నిర్లక్ష్యం వల్ల ప్రజల్లో గందరగోళం నెలకొందని ఆరోపించారు. హైదరాబాద్ లక్కాపూర్లో జరిగిన రాష్ట్ర రిటైర్డ్ రెవెన్యూ అధికారుల సమావేశంలో ఆయన ఈ వ్యాఖ్యలు చేశారు.

నిషేధిత జాబితాలోని భూ వివరాలపై ప్రస్తుతం ఆందోళనలు నెలకొన్నాయని ఆయన అన్నారు. 2015లో నిషేధిత భూముల జాబితా అంశంపై హైకోర్టు సుదీర్ఘ తీర్పు ఇచ్చిందని గుర్తుచేశారు. అన్ని జిల్లాల కలెక్టర్లకు స్పష్టమైన మార్గదర్శకాలు కూడా జారీ చేసినట్లు తెలిపారు.

ఇటీవల ప్రభుత్వం అన్ని జిల్లా కలెక్టర్లను సెక్షన్ 22A(1)(e) నిషేధ జాబితాలను తయారు చేయాలని ఆదేశించింది. కానీ రెవెన్యూ అధికారులకు సరైన అవగాహన లేకపోవడంతో కొన్ని భూములను తప్పుగా జాబితాలో చేర్చినట్లు ఆయన ఆరోపించారు.

ORC ఇచ్చిన భూములు, కాలనీలు, కొన్ని పట్టా భూములు, NOC ఇచ్చిన అసైన్డ్ భూములు కూడా నిషేధ జాబితాలో చేరాయని వివరించారు. దీనివల్ల ప్రజల్లో గందరగోళం పెరిగిందని తెలిపారు. సమస్యల పరిష్కారానికి అనుభవజ్ఞులైన రెవెన్యూ అధికారులతో కమిటీ ఏర్పాటు చేయాలని డిమాండ్ చేశారు.