సూర్యాపేటలో ₹8.57 కోట్ల స్ట్రామ్ వాటర్ డ్రైన్ నిర్మాణం ప్రారంభం

సూర్యాపేట పట్టణంలో వర్షాకాలంలో నీటి నిల్వ సమస్యను ఎదుర్కొనేందుకు ₹8.57 కోట్ల (₹857.40 లక్షల) వ్యయంతో స్ట్రామ్ వాటర్ డ్రైన్ నిర్మాణ పనులు ప్రారంభమయ్యాయి. ఈ ప్రాజెక్టును AIC సభ్యులు సర్వోత్తమ్ రామిరెడ్డి, మున్సిపల్ చైర్పర్సన్ గురిశెట్టి నివేదిత లక్షాది ప్రారంభించారు.

మొత్తం 1.1 కిలోమీటర్ల పొడవున నిర్మిస్తున్న డ్రైన్లో ప్రధాన కాలువ 600 మీటర్లు, అనుబంధ కాలువ 400 మీటర్లు ఉంటుంది. ఈ డ్రైన్ RK గార్డెన్ నుండి SP కార్యాలయం మీదుగా నల్ల చెరువు వరకు నిర్మించనున్నారు.

గతేడాది వర్షాకాలంలో 27, 29 వార్డుల్లో భారీ నీరు చేరడంతో పలు నివాస ప్రాంతాలు ముంపునకు గురయ్యాయి. దీన్ని దృష్టిలో పెట్టుకొని ఈ డ్రైన్ ప్రాజెక్టు రూపొందించినట్లు అధికారులు తెలిపారు.

ఈ డ్రైన్ నిర్మాణం పూర్తయితే భవిష్యత్తులో వరదల సమయంలో ఆయా వార్డుల్లో నీళ్లు నిల్వకుండా పారుదల జరుగుతుందని, ప్రజలు ఇబ్బందులు ఎదుర్కోరని మున్సిపల్ చైర్పర్సన్ పేర్కొన్నారు.