కరీంనగర్ రిసార్ట్‌లో యువకుడి అనుమానాస్పద మృతి, హత్య కేసు నమోదు

కరీంనగర్ శివారులోని చింతకుంట అధర్వ రిసార్ట్‌లో పెద్దపల్లి జిల్లా పాలితం గ్రామానికి చెందిన దురిశెట్టి అఖిల్ అనుమానాస్పద స్థితిలో మృతి చెందాడు. బుధవారం సాయంత్రం స్నేహితులతో కలిసి రిసార్ట్‌కు వచ్చిన అఖిల్ మృతదేహం గురువారం ఉదయం స్విమ్మింగ్ పూల్‌లో కనిపించింది.

మృతుడి తండ్రి సతీష్ ఫిర్యాదు మేరకు కొత్తపల్లి పోలీసులు హత్య కేసు నమోదు చేసి దర్యాప్తు చేస్తున్నారు. తన కుమారుడిని ఎలిగేటి అరవింద్, ముక్కర అంజి అనే స్నేహితులు బలవంతంగా పార్టీకి పిలిపించి, మద్యం తాగించి, కొట్టి చంపి, స్విమ్మింగ్ పూల్‌లో పడేశారని సతీష్ ఆరోపించారు. పోస్ట్మార్టం రిపోర్టు వచ్చాక మృతికి కారణం తేలుతుందని పోలీసులు చెబుతున్నారు.

రిసార్ట్‌లో ఆధార్ నమోదు, స్విమ్మింగ్ పూల్ వద్ద భద్రతా చర్యలు, సీసీ కెమెరాలు లేవని ప్రాథమిక విచారణలో తేలింది. ఈ ప్రాంతంలో రిసార్ట్లు, ఫార్మ్‌హౌస్‌లు విచ్చలవిడిగా పార్టీలు నిర్వహిస్తున్నాయని, పోలీసులు నిర్లక్ష్యం వహిస్తున్నారని స్థానికులు ఆరోపించారు. నిబంధనలు కఠినతరం చేయాలని వారు డిమాండ్ చేశారు.