తమిళ సినిమాలకు ₹1,000 కోట్ల బాక్స్ ఆఫీస్ మార్క్ ఇంకా దూరమే

తమిళ సినిమా ఇండస్ట్రీ ఇంకా ₹1,000 కోట్ల బాక్స్ ఆఫీస్ క్లబ్‌లోకి ప్రవేశించలేదు. ప్రస్తుతం బాక్స్ ఆఫీస్‌లో ఆడుతున్న జైలర్ 2 కూడా ఈ మార్క్ నుంచి దూరంగానే ఆగిపోయేలా కనిపిస్తోంది.

తెలుగు సినిమాలు పాన్-ఇండియా స్థాయిలో హిట్ అయితే హిందీ మార్కెట్ నుంచి ₹300-₹500 కోట్ల వరకు వసూళ్లు వస్తాయి. బాహుబలి, RRR, పుష్ప, కల్కి చిత్రాలను ఇందుకు ఉదాహరణగా చెబుతున్నారు. కన్నడ చిత్రం KGF 2 కి ఉత్తర భారత మార్కెట్ నుంచి ₹450 కోట్లు వచ్చినట్లు సమాచారం.

బాలీవుడ్ చిత్రాలు జవాన్, పఠాన్ వంటివి ఓవర్సీస్ మార్కెట్ మద్దతుతో ₹1,000 కోట్లను దాటాయి. కానీ తమిళ చిత్రాలకు ఉత్తర భారత ఆడియన్స్ నుంచి ఆ మేరకు మద్దతు లభించడం లేదు. హిందీ బెల్ట్ నుంచి కనీసం ₹50 కోట్లు కూడా రాకపోవడం ఈ లక్ష్యాన్ని దూరం చేస్తోంది.

జైలర్ 2 భారీ అంచనాలతో వచ్చినా సుమారు ₹800 కోట్ల వద్దే ఆగిపోయేలా కనిపిస్తోంది. తమిళ మార్కెట్, ఓవర్సీస్ మీద మాత్రమే ఆధారపడి ₹1,000 కోట్లు సాధించడం ఆచరణలో కష్టం. భవిష్యత్తులో తమిళ చిత్రాలు ఈ మార్క్ చేరాలంటే హిందీ ప్రేక్షకులను ఆకట్టుకునే పాన్-ఇండియా కంటెంట్ ఉండాల్సిందే.