తమిళనాడులో స్పెషల్ షోలకు కొత్త జీవో: ఉదయం 6 నుంచి రాత్రి 2:30 వరకు అనుమతి

తమిళనాడులో కొత్త సినిమాల ప్రదర్శనలపై ముఖ్యమంత్రి విజయ్ ప్రభుత్వం కొత్త జీవో జారీ చేసింది. విడుదలైన మొదటి వారంలో థియేటర్లు ఉదయం 6 గంటల నుంచి రాత్రి 2:30 గంటల వరకు షోలు వేసుకోవచ్చు.

వీకెండ్స్, పండుగలు, ప్రభుత్వ సెలవు దినాల్లో రోజుకు ఆరు షోలు వేయడానికి కూడా అనుమతి ఇచ్చారు. అయితే టికెట్ రేట్లను ఏమాత్రం పెంచబోమని ప్రభుత్వం స్పష్టం చేసింది. రేట్లు పెంచుకునేందుకు నిర్మాతలు పెట్టుకున్న అభ్యర్థనను ప్రభుత్వం అంగీకరించలేదు.

గతంలో తెలుగు రాష్ట్రాల మాదిరిగానే తమిళనాడు థియేటర్లలోనూ ఉదయపు షోలు ఉండేవి. 2023లో తునివు, వారసు సినిమాల విడుదల సమయంలో ఓ అభిమాని ప్రాణాలు కోల్పోయారు. ఆ ఘటన తర్వాత ఈ షోలను పూర్తిగా నిలిపివేశారు.

సామాన్య ప్రేక్షకులపై భారం పడకూడదనే ఉద్దేశంతో టికెట్ రేట్ పెంపును ప్రభుత్వం తిరస్కరించింది. నటుడు సూర్య నటించిన కొత్త సినిమా మామూలు రేట్లతోనే విడుదల కానుంది. మూడేళ్ల గ్యాప్ తర్వాత ఉదయం 6 గంటల షోలతో ఈ సినిమా ప్రేక్షకుల ముందుకు రానుంది.