గ్రూప్ 1 మెయిన్స్ అక్రమాల కేసులో విజయవాడ, హైదరాబాద్‌లో ED సోదాలు

ఏపీ గ్రూప్ 1 మెయిన్స్ వాల్యుయేషన్ అక్రమాల కేసులో ED రంగంలోకి దిగింది. విజయవాడ, హైదరాబాద్‌లో ED అధికారులు సోదాలు నిర్వహిస్తున్నారు.

నేరడిమెట్ డిఫెన్స్ కాలనీలో Two Grander Services కార్యాలయంలో సోదాలు జరుగుతున్నాయి. అదే ప్రాంతంలో ఆకెళ్ల పేరి శ్రీనివాస్ నివాసంలోనూ అధికారులు తనిఖీలు చేస్తున్నారు. కీలక పత్రాలను స్వాధీనం చేసుకుని పరిశీలిస్తున్నారు.

హైదరాబాద్ అల్వాల్ వెంకటాపురంలో మహంకాళి రఘురామ నివాసంలో ఉదయం నుంచి సోదాలు కొనసాగుతున్నాయి. APPSC కేసుకు సంబంధించి ఈ తనిఖీలు జరుగుతున్నాయి. ఇక్కడా కీలక పత్రాలను అధికారులు పరిశీలిస్తున్నారు.

గతంలో వైఎస్ఆర్సీపీ ప్రభుత్వ హయాంలో నిర్వహించిన గ్రూప్ 1 మెయిన్స్ వాల్యుయేషన్‌లో పెద్ద ఎత్తున అక్రమాలు జరిగాయని ఫిర్యాదులు వచ్చాయి. ఆ కేసులో SIT విచారణ ఆధారంగా ED ఈ సోదాలు చేపట్టింది. మనీ లాండరింగ్ కోణంలో విచారణ జరుగుతోంది. వాల్యుయేషన్‌లో కోట్ల రూపాయల అక్రమ ఆర్థిక లావాదేవీలు జరిగాయని ఆరోపణలు ఉన్నాయి.

ఈ ఆరోపణలపై వైఎస్ఆర్సీపీ స్పందన తెలియాల్సి ఉంది. సోదాలు ఇప్పటికీ కొనసాగుతున్నాయి.