తిరుమల మోకాళ్ళ మెట్టు సమీపంలో వ్యక్తి అదృశ్యం.. గాలింపు కొనసాగుతోంది

తిరుమల మొదటి ఘాట్ రోడ్డులోని మోకాళ్ళ మెట్టు సమీపంలో 40 ఏళ్ల వయసున్న ఒక వ్యక్తి అదృశ్యమయ్యాడు. రోడ్డు పక్క డివైడర్ దాటి అతను అవ్వాచార్య కోన వైపు దిగిపోయినట్టు అక్కడ ఉన్నవారు చెప్తున్నారు.

సంఘటనను గమనించిన వాహన డ్రైవర్లు వెంటనే విజిలెన్స్ సిబ్బందికి సమాచారం అందించారు. దీంతో విజిలెన్స్, అటవీ శాఖ, పోలీసులు, ఫైర్ సిబ్బంది ఘటనా స్థలానికి చేరుకున్నారు. అవ్వాచార్య కోన ప్రాంతంలో గాలింపు చర్యలు మొదలయ్యాయి.

రెస్క్యూ సిబ్బంది తాళ్ల సాయంతో కిందకి దిగి పలుమార్లు గాలించారు. మెగాఫోన్ ద్వారా పిలిచినా ఎవరూ స్పందించలేదు. ఇప్పటికే మూడు నుంచి నాలుగు సార్లు కిందకి దిగి పరిశీలించినట్టు రెస్క్యూ బృందం తెలిపింది. మరో మార్గం నుంచి అదనపు బృందాలను పంపించారు.

ఆ ప్రాంతంలో గతంలో భక్తులు జారి కిందపడిన సంఘటనలు ఉన్నాయని అధికారులు చెప్తున్నారు. ప్రమాదాలు జరగకుండా అక్కడ దాదాపు 10 అడుగుల ఎత్తులో ఇనుప కమ్మీలు, వల వంటి నిర్మాణం ఏర్పాటు చేశారు.

అదృశ్యమైన వ్యక్తి తిరిగి పైకి వచ్చేశాడా, లేక దట్టమైన అడవిలోకి జారిపోయాడా అనే కోణంలో అధికారులు పరిశీలిస్తున్నారు. సాయంత్రం నాటికి పరిస్థితిపై స్పష్టత వస్తుందని భావిస్తున్నారు.