ఏలూరులో భారీ వర్షాలు: పోలవరం ఏజెన్సీలో 26 గ్రామాలకు రాకపోకలు నిలిచిపోయాయి

మురుసు తుఫాన్ ప్రభావంతో ఏలూరు జిల్లాలో భారీ నుంచి అతి భారీ వర్షాలు కురుస్తున్నాయి. జిల్లాలోని వాగులు, వంకలు పొంగిపొర్లుతున్నాయి.

పోలవరం ఏజెన్సీ ప్రాంతంలో దాదాపు 26 గ్రామాలకు రాకపోకలు తాత్కాలికంగా నిలిచిపోయాయి. ఏజెన్సీలోని దాదాపు 25 మండలాల్లో రోడ్లపై వరద నీరు చేరింది. దీంతో రవాణా వ్యవస్థ నిలిచిపోయింది.

జంగారెడ్డిగూడెం ప్రాంతంలో సంచార జాతుల కుటుంబాలు చిన్న షెడ్లు, టెంట్లలో నివాసం ఉంటున్నాయి. ఇక్కడ 80కి పైగా కుటుంబాలు ఉన్నాయని స్థానికులు చెప్తున్నారు. మూడు రోజుల క్రితం కురిసిన తుఫాను తర్వాత ఇప్పుడు మళ్లీ వర్షాలు కురుస్తున్నాయి.

టెంట్లలో ఇద్దరు వృద్ధులు, బాలింతలు, నెలల వయసున్న శిశువు ఉన్నారు. టెంట్లపై ఉన్న ప్లాస్టిక్ షీట్లు చిరిగిపోవడంతో వర్షపు నీరు లోపలికి చేరుతోంది. కింద నుంచి వరద నీరు ప్రవహిస్తోంది.

రెండు రోజులుగా తినడానికి ఆహారం లేదని బాధితులు చెప్తున్నారు. వంట చేయడానికి కూడా సామగ్రి తడిచిపోయిందని వారు తెలిపారు.

"ఎవరూ మా దగ్గరకు రాలేదు. ఎలాంటి సౌకర్యం కల్పించలేదు" అని ఓ బాలింత తెలిపారు. తనకు ఏడుగురు సంతానం ఉన్నారని ఆమె చెప్పారు.

బాధిత కుటుంబాలు ఇప్పటికైనా అధికారులు స్పందించాలని కోరుతున్నాయి. తమకు సరైన షెల్టర్, ఆహారం, పునరావాసం కల్పించాలని కుటుంబాలు విజ్ఞప్తి చేస్తున్నాయి.