మురసు తుఫాను ప్రభావం: కాకినాడలో భారీ వర్షాలు, లోతట్టు ప్రాంతాలు జలమయం

మురసు తుఫాను ప్రభావంతో కాకినాడ జిల్లాలో భారీ వర్షాలు కురుస్తున్నాయి. ఎడతెరిపి లేకుండా కురుస్తున్న వర్షాలకు నగరంలోని లోతట్టు ప్రాంతాలు, ప్రధాన రహదారులు నీట మునిగాయి. కాకినాడలో కొండపోత వాన కురిసింది.

శాంతినగర్, సాంబమూర్తి నగర్, పెద్ద మార్కెట్, గుడారిగుంట ప్రాంతాల్లో మోకాల్లోతు వరకు నీరు చేరింది. రహదారులపై వరద నీరు నిలిచిపోవడంతో వాహనదారులు, పాదచారులు తీవ్ర ఇబ్బందులు ఎదుర్కొంటున్నారు. బస్ స్టాండ్ సమీపంలో నీరు నిలిచి నడవడం కూడా కష్టమవుతోంది.

పాఠశాలలు, కళాశాలలు, కార్యాలయాలకు వెళ్లే సమయంలోనే వర్షం కురవడంతో విద్యార్థులు, ఉద్యోగులు ఇబ్బందులు పడ్డారు. ద్విచక్ర వాహనాలు నీటిలో మొరాయించడంతో కొందరు వాటిని తోసుకుంటూ వెళ్లాల్సి వచ్చింది. రద్దీ తగ్గడంతో వ్యాపార సంస్థలు, దుకాణాలకు కూడా కస్టమర్ల రాక తగ్గింది.

ప్రత్తిపాడు, కత్తిపూడి, పిఠాపురం ప్రాంతాల్లోనూ వర్షం జోరుగా కురుస్తోంది. జిల్లా వ్యాప్తంగా జనజీవనం ప్రభావితమైంది.