ధాన్యం నిల్వకు తెలంగాణలో 10 సైలో కేంద్రాలు.. 10 లక్షల టన్నుల సామర్థ్యం

తెలంగాణలో ప్రభుత్వం కొనుగోలు చేసే ధాన్యాన్ని భద్రంగా నిల్వ చేసేందుకు రాష్ట్రవ్యాప్తంగా 10 సైలో కేంద్రాలు ఏర్పాటు చేయాలని ప్రతిపాదనలు సిద్ధమవుతున్నాయి. ఈ కేంద్రాల్లో మొత్తం 10 లక్షల టన్నుల ధాన్యాన్ని నిల్వ చేయాలని లక్ష్యంగా పెట్టుకున్నారు.

ఒక్కో సైలో కేంద్రంలో లక్ష టన్నులు అంటే 10 లక్షల క్వింటాళ్ల ధాన్యాన్ని నిల్వ చేసే సామర్థ్యం ఉండాలని ప్రతిపాదించారు. సైలోలు అంటే ధాన్యాన్ని పెద్ద మొత్తంలో నేరుగా నిల్వ చేసే ఆధునిక ఉక్కు గిడ్డంగులు. వీటిలో నిల్వకు ముందే ధాన్యాన్ని శుభ్రపరిచి ఆరబెట్టే సదుపాయాలు కల్పించాలని ప్రతిపాదనలో ఉంది.

దీనివల్ల ధాన్యం నాణ్యత కాపాడుతుందని, గోనె సంచుల అవసరం, నిల్వ ఖర్చులు తగ్గే అవకాశం ఉందని పరిశీలిస్తున్నారు.

ఈ ప్రతిపాదనలపై మంత్రి ఉత్తమ్ కుమార్ రెడ్డి సెక్రటేరియట్‌లో సమీక్ష సమావేశం నిర్వహించారు. సైలోల ఏర్పాటు సాధ్యాసాధ్యాలు, నిర్మాణానికి అవసరమైన సాంకేతిక పరిజ్ఞానం, నిర్వహణ పద్ధతులు, వ్యయంపై నిపుణులు, పౌర సరఫరాల శాఖ అధికారులతో ఆయన చర్చించారు.

సమీక్షలో పౌర సరఫరాల శాఖ కమిషనర్ స్టీఫెన్ రవీంద్ర, అదనపు డైరెక్టర్ రోహిత్, సంబంధిత ఏజెన్సీల ప్రతినిధులు పాల్గొన్నారు.