ఎల్ నినో ప్రభావంతో తెలంగాణ ప్రభుత్వం మూడు దశల కార్యచరణ

ప్రస్తుతం ఖరీఫ్ సీజన్‌లో ఎల్ నినో ప్రభావంతో వర్షాభావం ఎదురయ్యే అవకాశం ఉన్న నేపథ్యంలో తెలంగాణ వ్యవసాయ శాఖ మూడు దశల కార్యచరణ రూపొందించింది. రైతులకు నష్టం జరగకుండా ఈ ప్లాన్ అమలు చేయాలని మంత్రి తుమ్మల నాగేశ్వరరావు అధికారులను ఆదేశించారు.

జూలై 15, జూలై 30, ఆగస్టు 15 తేదీలను మూడు దశలుగా నిర్ణయించి, వర్షపాతం పరిస్థితులకు తగ్గట్టు ప్రత్యేక ప్రణాళికలు సిద్ధం చేశారు. వర్షాలు ఆలస్యమైతే విత్తనాల కొరత రాకుండా భారీ ఎత్తున నిల్వలు సిద్ధం చేస్తున్నట్లు అధికారులు వెల్లడించారు. జిల్లాల వారీగా కూడా ప్రత్యేక ప్రణాళికలు అందుబాటులో ఉన్నాయి.

రాష్ట్రంలో కొన్ని జిల్లాల్లో సాధారణ వర్షపాతం నమోదు కాగా, మరికొన్ని జిల్లాల్లో లోటు కనిపిస్తోంది. జిల్లా కలెక్టర్లు, వ్యవసాయ శాస్త్రవేత్తలు క్షేత్ర స్థాయిలో నిరంతరం పర్యవేక్షించాలని మంత్రి సూచించారు. ప్రతి వారం మండలాల వారీగా వ్యవసాయ వాతావరణ బులెటిన్ విడుదల చేయాలని ప్రభుత్వం నిర్ణయించింది. ఇందులో వర్షపాతం, ఉష్ణోగ్రతలు, నేల తేమ, భూగర్భ జలాలు, సాగునీటి లభ్యత, విద్యుత్ సరఫరా, పంటల స్థితి, రైతులు తీసుకోవాల్సిన చర్యలు వంటి అంశాలు ఉంటాయి.

వర్షాలు పడిన తర్వాతే విత్తనాలు వేయడం, నేల తేమను కాపాడుకోవడం, సరైన సమయంలో ఎరువులు వాడడం, తక్కువ నీటితో సాగు చేసే పద్ధతులు వంటి శాస్త్రీయ సూచనలను ప్రతి రైతుకు చేరవేయాలని మంత్రి ఆదేశించారు. వరి సాగు చేస్తున్న రైతులకు నారు నిర్వహణ, నాటడం దూరం, ఎరువుల వినియోగంపై శాస్త్రవేత్తల మార్గదర్శకాలు పాటించాలని సూచించారు. నారు వేయని రైతులు తక్కువ కాలంలో పండే రకాలు, ప్రత్యామ్నాయ పంటలను పరిశీలించాలి. నీటి లభ్యత తక్కువగా ఉన్న ప్రాంతాల్లో వరికి బదులు మొక్కజొన్న, సజ్జలు, రాగులు, కందులు, మినుములు, నువ్వులు, పొద్దు తిరుగుడు, కూరగాయల సాగును ప్రోత్సహించనున్నారు.

ఇప్పటికే మొలక దశలో ఉన్న మొక్కజొన్న, పత్తి పంటలకు రాబోయే రెండు వారాలు కీలకం. వర్షాభావం కొనసాగితే కలుపు నియంత్రణ, తేమ సంరక్షణ చర్యలు తప్పనిసరి. రైతు నేస్తం కార్యక్రమం ద్వారా ఎల్ నినో ప్రభావాలు, నీటి యాజమాన్యం, వాతావరణ ఆధారిత వ్యవసాయంపై అవగాహన కల్పిస్తామని ప్రభుత్వం తెలిపింది. ఎల్ నినో తీవ్రత ఎలా ఉన్నా రైతులు నష్టపోకుండా అన్ని చర్యలు తీసుకుంటామని మంత్రి హామీ ఇచ్చారు. సాగు పూర్తిగా మానేయాల్సిన అవసరం లేదని, నీటి లభ్యతను బట్టి పంటల ఎంపికలు మార్చుకోవాలని ప్రభుత్వం సూచించింది.