షాబాద్ ఘటన: ఆరుగురి హత్య తర్వాత తల్లిదండ్రులకు ఫోన్ చేసిన రాజ్‌కుమార్ - CP తరుణ్ జోషి

షాబాద్‌లో జరిగిన ఆరు హత్యల ఘటనలో నిందితుడు రాజ్‌కుమార్ తల్లిదండ్రులకు ఫోన్ చేసి విషయాన్ని చెప్పినట్లు పోలీస్ కమిషనర్ తరుణ్ జోషి వెల్లడించారు.

రాత్రి 11.57 గంటల సమయంలో రాజ్‌కుమార్ తన తండ్రికి ఫోన్ చేసి, తాను ఆరుగురిని హత్య చేసినట్లు తెలియజేశాడు. తనకు బతకాలని లేదని, చనిపోవడానికి వెళ్తున్నానని చెప్పాడు. దీంతో తల్లిదండ్రులు రాత్రి ఒంటి గంట సమయంలో పోలీస్ స్టేషన్‌లో ఫిర్యాదు చేశారు.

పోలీసులు వెంటనే ప్రత్యేక బృందాలు ఏర్పాటు చేసి నిందితుడి కోసం గాలింపు చర్యలు మొదలుపెట్టారు. నేరం జరిగిన మూడు ప్రదేశాల నుండి సైంటిఫిక్, టెక్నికల్ ఆధారాలు సేకరించారు.

షాబాద్ గ్రామంలోని ఇల్లు, చెరువు దగ్గర, దెవలకొండలోని భార్య ఇంటి వద్ద ఈ హత్యలు జరిగాయి. పోలీసులు కుటుంబ సభ్యులు, స్నేహితులు, బంధువులను విచారించారు.

నిందితుడి గతంపై విచారణలో, ఇటీవలే మే నెలలో అతనిపై పోక్సో కేసు నమోదైందని, ఆ తర్వాత రెండు వారాలుగా పరారీలో ఉన్నాడని తెలిసింది. ఆ సమయంలో ESCI ప్రాంతంతో పాటు శ్రీశైలంలో నాలుగు రోజులు గడిపాడు. నిందితుడి వద్ద నగదు తక్కువగా ఉండటంతో ఉచిత భోజనం, వసతి లభించే ప్రదేశాల్లో తలదాచుకునే అవకాశం ఉందని పోలీసులు భావిస్తున్నారు.

నిందితుడి కోసం అన్ని చోట్లా తనిఖీలు కొనసాగుతున్నాయని, ప్రత్యేక బృందాలు ఇతర ప్రాంతాలకు కూడా పంపించామని CP తరుణ్ జోషి తెలిపారు.