హార్ముజ్ రక్షణకు గల్ఫ్ దేశాలు చెల్లించాలి: ట్రంప్

వాషింగ్టన్: స్ట్రెయిట్ ఆఫ్ హార్ముజ్‌లో అమెరికా ఇస్తున్న రక్షణకు ప్రతిఫలంగా సౌదీ అరేబియా, యూఏఈ, కతార్, బహ్రెయిన్, కువైట్ తదితర గల్ఫ్ దేశాలు చెల్లించాలని అమెరికా అధ్యక్షుడు డొనాల్డ్ ట్రంప్ డిమాండ్ చేశారు. ఇరాన్‌తో కొనసాగుతున్న సైనిక చర్య నేపథ్యంలో ఆయన ఈ వ్యాఖ్యలు చేశారు.

'ప్రపంచంలోని అత్యంత సంపన్న ప్రాంతాన్ని మేము కాపాడుతున్నాం. ఇందుకు భారీగా ఖర్చు చేస్తున్నాం. ఆ రక్షణకు ఆయా దేశాలు మాకు తిరిగి చెల్లించాలి' అని ట్రంప్ అన్నారు. వెనిజులాతో కలిపి అమెరికా వద్ద ప్రపంచ చమురు సరఫరాలో 50 శాతానికి పైగా ఉందని, తమకు ఆ ప్రాంతం అవసరం లేదని, అయినా మిత్రదేశాలను రక్షించాల్సిన బాధ్యత ఉందని ఆయన వివరించారు.

ఇరాన్‌పై దాడులు తీవ్రం చేసినట్లు ప్రకటిస్తూ, ఇరాన్ సైనిక సామర్థ్యాన్ని నిర్మూలిస్తున్నామని ట్రంప్ చెప్పారు. హార్ముజ్ జలసంధిపై పూర్తి నియంత్రణ సాధించామని, ఇరాన్‌తో వ్యాపారం చేసే నౌకలకు మినహా మిగతా వాణిజ్య నౌకలు రాకపోకలు సాగించవచ్చని తెలిపారు. ఇరాన్‌పై నౌకా దిగ్బంధనం విధించామని, ఇది చాలా బలమైన చర్య అని ఆయన పేర్కొన్నారు.

ఇరాన్‌తో ఒప్పందం కుదిరిందని, కానీ కొన్ని అంశాలు నచ్చక వారు వెంటనే దాన్ని రద్దు చేసుకున్నారని ట్రంప్ తెలిపారు. 47 ఏళ్లుగా చర్చలు జరుపుతున్నా ఇప్పటివరకు ఎవరూ ఇరాన్‌పై సైనికంగా దాడి చేయలేదని, తాము మాత్రం తీవ్రంగా దెబ్బతీస్తున్నామని చెప్పారు. 'మరో పెద్ద దాడికి సిద్ధమవుతున్నాం' అని ప్రకటించారు.

ఇరాన్‌లో 52 వేల మంది నిరసనకారులను చంపేశారని, వారి ప్రవర్తన చాలా దారుణంగా ఉందని ట్రంప్ ఆరోపించారు. ఇరాన్‌కు వ్యతిరేకంగా తమ వద్ద భారీ మందుగుండు సామగ్రి ఉందని, సంవత్సరాల్లో లేని విధంగా దాడి సామర్థ్యం పెరిగిందని చెప్పారు. దాడులు-దిగ్బంధనం కలిసి మరింత ప్రభావం చూపుతాయని ట్రంప్ వ్యాఖ్యానించారు. ఇరాన్ మళ్లీ చర్చలకు సిద్ధమని సంకేతాలు వచ్చినట్లు తెలియజేశారు.