రెండు రోజుల క్రితమే ఒప్పందం కుదిరింది.. ఇప్పుడు వెనక్కి తగ్గారు: ఇరాన్‌పై ట్రంప్ ఆగ్రహం

అమెరికా అధ్యక్షుడు డొనాల్డ్ ట్రంప్ ఇరాన్‌పై తీవ్ర విమర్శలు చేశారు. రెండు రోజుల క్రితమే ఇరాన్‌తో ఒక ఒప్పందం కుదిరిందని, అయితే తర్వాత ఆ దేశం 'మేము ఈ ఒప్పందం చేయలేము, మరింత చర్చించాలి' అని వెనక్కి తగ్గిందని ట్రంప్ ఆరోపించారు. 'మీరు ఏదైనా సాధించాలనుకునే వ్యక్తులను సంపాదించుకోవాలి. 47 ఏళ్లుగా ఇరాన్ ఇదే పని చేస్తోంది. బుష్, ఒబామా, బైడెన్, వారికంటే ముందున్నవారు ఈ పని చేసి ఉండాల్సింది. కానీ నేను చర్చించినట్లు ఎవరూ చర్చించలేదు' అని ట్రంప్ వ్యాఖ్యానించారు. ఏ ఒప్పందం గురించి మాట్లాడారనేది స్పష్టంగా తెలియరాలేదు గానీ, ఇరాన్ అణు కార్యక్రమానికి సంబంధించిన ఒప్పందమే అయి ఉంటుందని అంతర్జాతీయ మీడియా భావిస్తోంది. 2015లో ఇరాన్ అణు ఒప్పందం (JCPOA) కుదిరింది. కానీ 2018లో ట్రంప్ తన తొలి టర్మ్‌లో అమెరికాను ఆ ఒప్పందం నుంచి వైదొలిగించి, ఇరాన్‌పై కఠినమైన ఆంక్షలు విధించారు. అప్పటి నుంచి ఇరాన్ అణు విస్తరణపై ఉద్రిక్తతలు కొనసాగుతున్నాయి. రెండోసారి అధ్యక్షుడైన తర్వాత ట్రంప్ ఇరాన్‌తో కొత్త ఒప్పందం కుదుర్చుకునే ప్రయత్నాలు ప్రారంభించారు. అయితే ఇరాన్ నిరాకరించడం, కొత్త చర్చలు కోరడం వల్ల ఈ ఒప్పందం వెంటనే విఫలమైంది. ప్రపంచ చమురు మార్కెట్‌లో ఇరాన్ ప్రధాన సరఫరాదారు. అమెరికా ఆంక్షల కారణంగా భారత్‌కు ఇరాన్ నుంచి ముడి చమురు దిగుమతులు ఆగిపోయాయి. దీంతో భారత్ ఇతర దేశాలపై ఆధారపడాల్సి వచ్చింది. ఈ నేపథ్యంలో ట్రంప్ తాజా వ్యాఖ్యలతో అమెరికా-ఇరాన్ సంబంధాలు మరింత దెబ్బతినే అవకాశం ఉంది.