జ్యేష్ఠ అమావాస్య మంగళవారంతో కలిసి వచ్చినప్పుడు ఆచరించే విశేష పూజలు, దీపాలు

జ్యేష్ఠ మాసంలో అమావాస్య రోజు మంగళవారం కలిసి వస్తే దాన్ని భౌమ అమావాస్య అని పిలుస్తారు. ఈ రోజు చాలా శక్తివంతమైనదిగా హిందూ సంప్రదాయం భావిస్తుంది.

ఈ సందర్భంగా భక్తులు పితృ దేవతలకు తర్పణం ఇస్తారు. ఇంటి యజమాని నల్ల నువ్వులు కలిపిన నీళ్లు దక్షిణ దిక్కుకు తిరిగి వదలాలి. స్వయంపాకం దానం, గోవుకి ఆహారం పెట్టడం, అన్నదానం చేయడం వంటి ఆచారాలు కూడా పితృ దోషాల నివారణకు చేస్తారు.

రావి చెట్టు దగ్గర మట్టి ప్రమిదలో మరో ప్రమిద ఉంచి, ఆవాల నూనె పోసి 12 జ్యోతులు వెలిగించడం విశేషం. దీన్ని అమావాస్య ద్వాదశ దీపం అంటారు. మహిళలు వటసావిత్రి వ్రతం చేసుకోలేనివారు మర్రి చెట్టు దగ్గర దీపం పెట్టి ప్రదక్షిణలు చేస్తే అదే ఫలితం లభిస్తుందని నమ్మకం.

లక్ష్మీదేవి పూజ ఈ రోజు ప్రత్యేకంగా చేస్తారు. ఇంట్లోని గజలక్ష్మి లేదా ధనలక్ష్మి చిత్రపటానికి పుష్పాల అలంకరణ చేసి, ఆవు నెయ్యి లేదా నువ్వుల నూనెతో దీపం వెలిగించాలి. ఎరుపు ఒత్తులతో దీపం పెడితే అద్భుత ఫలితాలు ఉంటాయని తాంత్రిక గ్రంథాలు తెలుపుతున్నాయి. ఓం శ్రీం హ్రీం శ్రీం కమలే కమలాలయే... అనే మంత్రంతో లేదా ఓం భువనేశ్వరియై నమః అని పఠిస్తూ పూజ చేయవచ్చు.

అలాగే తీవ్రమైన రుణబాధల నుంచి బయటపడేందుకు కుజుని శాంతి కోసం ఇంట్లో దక్షిణ దిక్కులో త్రిభుజాకార ముగ్గు వేసి, హృమ అనే బీజాక్షరం రాసి, 9 ఎరుపు రంగు ఒత్తులతో దీపం వెలిగించడం ఆనవాయితీ. దీనిని కుజదీపం లేదా భౌమ అమావాస్య దీపం అంటారు.