చింతూరు అడవుల పునరుద్ధరణకు డ్రోన్లతో సీడ్ బాల్స్ వెదజల్లుతున్న ఏపీ అటవీ శాఖ

ఆంధ్రప్రదేశ్ అటవీ శాఖ చింతూరు అటవీ ప్రాంతంలో అటవీ పునరుద్ధరణ కోసం డ్రోన్ల ద్వారా సీడ్ బాల్స్ వెదజల్లుతోంది. రాష్ట్ర డిప్యూటీ ముఖ్యమంత్రి పవన్ కల్యాణ్ ఆదేశాల ప్రకారం ఈ కార్యక్రమం ప్రారంభమైంది. ప్రజల సహకారంతో 3.80 కోట్ల సీడ్ బాల్స్ తయారు చేయగా, ఇప్పటికే 90 లక్షలను సిబ్బంది సహాయంతో చేతితో వెదజల్లారు. మిగిలిన వాటిని డ్రోన్ల ద్వారా మారుమూల అడవుల్లో చల్లుతున్నారు.

ఈ కార్యక్రమాన్ని ఈ ఏడాది ప్రపంచ పర్యావరణ దినోత్సవం సందర్భంగా ప్రారంభించారు. 2.5 కోట్ల లక్ష్యానికి బదులుగా 3.80 కోట్ల సీడ్ బాల్స్ సిద్ధం అయ్యాయని అధికారులు తెలిపారు. చింతూరు అటవీ డివిజన్లో క్షీణించిన 440.50 హెక్టార్ల అటవీ ప్రాంతాన్ని గుర్తించి, లక్కవరన్ రిజర్వ్ ఫారెస్ట్ నుంచి పునరుద్ధరణ చర్యలు మొదలయ్యాయి.

ఈ సీజన్లో కంసులూరు, మర్రిగూడ, దేవరపల్లి, రేపాక, వాలి సుగ్రీవ, భద్రాచలం అటవీ బ్లాక్లకు కూడా డ్రోన్లతో సీడ్ బాల్స్ వేయనున్నారు. వేప, చింత, నేరేడు, ఉసిరి, నల్లమద్ది వంటి దేశీయ జాతుల విత్తనాలతో ఈ సీడ్ బాల్స్ తయారు చేశారు. పచ్చదనం పెంపుతో పాటు జీవ వైవిధ్య పరిరక్షణ, వాతావరణ మార్పుల ప్రభావాన్ని తగ్గించడం ప్రభుత్వ లక్ష్యమని అధికారులు చెబుతున్నారు.