గద్వాలలో శంకుస్థాపన కార్యక్రమంలో ప్రోటోకాల్ వివాదం: సరిత తిరుపతియ్య అసంతృప్తి

గద్వాల జిల్లాలోని కురూరు సమీపంలో రోడ్ డెవలప్మెంట్ పనుల శంకుస్థాపన కార్యక్రమంలో ప్రోటోకాల్ వివాదం చోటుచేసుకుంది. రాష్ట్ర గొర్రెలు మేకల అభివృద్ధి సమాఖ్య చైర్ పర్సన్ సరిత తిరుపతియ్య పేరు శిలాఫలకంపై లేకపోవడంతో ఆమె అసంతృప్తి వ్యక్తం చేస్తూ కార్యక్రమం నుంచి మధ్యలోనే వెళ్లిపోయారు.

ఈ సందర్భంగా మంత్రులు కోమటిరెడ్డి వెంకట్ రెడ్డి, జూపల్లి కృష్ణారావు, వాకిటి శ్రీహరి పాల్గొన్నారు. ఈ శంకుస్థాపన కార్యక్రమం ₹339.39 కోట్ల రోడ్ డెవలప్‌మెంట్ పనుల కోసం నిర్వహించారు.

ప్లేపై తన పేరు లేకపోవడాన్ని గురించి అధికారులను ప్రశ్నించగా, జీవో కాపీలో తన పేరు లేదని, అందుకే శిలాఫలకంపై పేరు పెట్టలేదని అధికారులు తెలిపినట్లు సమాచారం. దీంతో సరిత తిరుపతియ్య కార్యక్రమ స్థలిని విడిచి వెళ్లారు. ఈ విషయం మంత్రుల దృష్టికి రావడంతో వారు అప్రమత్తమయ్యారు. మంత్రులు జూపల్లి కృష్ణారావు, కోమటిరెడ్డి వెంకటరెడ్డి వెంటనే సరిత ఇంటికి వెళ్లారు.

తమకు జిల్లాలో అడుగడుగునా ప్రోటోకాల్ విషయంలో అన్యాయం జరుగుతోందని, అధికారులు పట్టించుకోవడం లేదని సరిత మంత్రులకు వివరించారు. మంత్రులు సానుకూలంగా స్పందించి, ఇలాంటి పరిస్థితి మళ్లీ రాకుండా చూస్తామని హామీ ఇచ్చారు. దీంతో వివాదం సద్దుమణిగింది.