మల్లేపల్లి ఏటీసీలో ఏటీసీ విద్యార్థులకు ఉద్యోగ మేళా, 13 కంపెనీలు పాల్గొన్నాయి

హైదరాబాద్‌లోని మల్లేపల్లి ఏటీసీ (అడ్వాన్స్డ్ టెక్నాలజీ సెంటర్) క్యాంపస్‌లో రెండేళ్ల కోర్సు పూర్తి చేసిన విద్యార్థుల కోసం శనివారం ప్రత్యేక జాబ్ మేళా నిర్వహించారు. టాటా టెక్నాలజీస్ లిమిటెడ్ ఆధ్వర్యంలో జరిగిన ఈ మేళాలో 13 ప్రముఖ కంపెనీలు పాల్గొన్నాయి.

డిపార్ట్మెంట్ ఆఫ్ ఎంప్లాయ్మెంట్ అండ్ ట్రైనింగ్ డైరెక్టర్ నిర్మలా కాంతి వెస్లీ మాట్లాడుతూ, హైదరాబాద్ రీజియన్‌లోని ఏటీసీ సెంటర్ల నుంచి సుమారు 1000 మంది విద్యార్థులు ఈ మేళాలో పాల్గొన్నారని తెలిపారు. రేపు వరంగల్‌లో కూడా జాబ్ మేళా నిర్వహిస్తామని, రెండు మేళాల్లో కలిపి దాదాపు 2000 మందికి ఉద్యోగ అవకాశాలు లభిస్తాయని ఆశిస్తున్నట్లు చెప్పారు.

రాష్ట్ర ప్రభుత్వం యువత ఉపాధి కల్పన కోసం కృషి చేస్తోందని ఆమె అన్నారు. సీఎం రేవంత్ రెడ్డి ప్రారంభించిన ఈ ఏటీసీ కేంద్రాల నుంచి ఇప్పుడు మొదటి బ్యాచ్ విద్యార్థులు కోర్సు పూర్తి చేసుకుని ఉద్యోగాల కోసం ప్రయత్నిస్తున్నారు. కాంగ్రెస్ ప్రభుత్వం అధికారంలోకి వచ్చిన తర్వాత అధునాతన సాంకేతికతతో ఏటీసీ సెంటర్లను ఏర్పాటు చేసిందని నిర్మలా కాంతి వెస్లీ వివరించారు.

రీజనల్ డిప్యూటీ డైరెక్టర్ ఇ.ఎస్.వి.కె. నాగేష్ మాట్లాడుతూ, పదో తరగతి, ఇంటర్ తర్వాత ఐటీఐ కోర్సులు పూర్తి చేసిన విద్యార్థులకు ప్రముఖ కంపెనీల్లో ప్లేస్‌మెంట్లు దక్కడం సంతోషంగా ఉందని అన్నారు. మేళాలో ఉద్యోగాలు పొందిన విద్యార్థులు కూడా ఆనందం వ్యక్తం చేశారు. ఈ కార్యక్రమంలో ఎయిర్‌టెల్, కన్స్ట్రక్షన్, సాఫ్ట్‌వేర్ కంపెనీలు పాల్గొన్నాయని ఆయన తెలిపారు.