AP ప్రభుత్వం 8 ప్రైవేట్ పారిశ్రామిక పార్కులకు ఆమోదం; 4,196 ఎకరాలు, రూ.1,720 కోట్ల పెట్టుబడి

ఆంధ్రప్రదేశ్ ప్రభుత్వం కొత్త ప్రైవేట్ ఇండస్ట్రియల్ పార్కుల విధానాన్ని అమలు చేస్తోంది. ఈ విధానంలో భాగంగా రాష్ట్రవ్యాప్తంగా ఎనిమిది ప్రైవేట్ పారిశ్రామిక పార్కుల ఏర్పాటుకు అనుమతి ఇచ్చింది. మొత్తం 4,196 ఎకరాల భూమి అందుబాటులోకి రానుండగా, మౌలిక సదుపాయాల కల్పనకు రూ.1,720 కోట్ల పెట్టుబడి పెడతారు. లక్షల మందికి ఉపాధి కల్పించడం లక్ష్యంగా ఈ పార్కులను ప్రోత్సహిస్తున్నట్లు ప్రభుత్వం తెలిపింది.

వీటిలో పెద్ద పార్కులు నెల్లూరు, విజయనగరం జిల్లాల్లో ఉన్నాయి. నెల్లూరు జిల్లాలో 2,776 ఎకరాల్లో రూ.870 కోట్లతో ఇఫ్కో కిసాన్ SEZ, విజయనగరం జిల్లాలో 1,163 ఎకరాల్లో రూ.531 కోట్లతో జెఎస్ టి డబుల్ ఇండస్ట్రియల్ పార్క్ ఏర్పాటవుతాయి. విశాఖపట్నంలో 63 ఎకరాల్లో కె. కుమార్ ఇన్ఫ్రా ప్రాజెక్ట్స్, అనకాపల్లి జిల్లాలో 93 ఎకరాల్లో బరాహా ఇండస్ట్రియల్ పార్క్ నిర్మాణం జరుగుతుంది. చిత్తూరు, అనకాపల్లి జిల్లాల్లో మహిళా పారిశ్రామికవేత్తల కోసం రెండు ప్రత్యేక పార్కులు కూడా ఏర్పాటు చేస్తున్నారు. కృష్ణా జిల్లాలో 27 ఎకరాల్లో శ్రీవేద ఇన్నోవేషన్ పార్క్, పల్నాడు జిల్లాలో 27.88 ఎకరాల్లో ఆర్షధాతు గ్రీన్ టెక్నాలజీస్ పార్క్ కూడా ఉన్నాయి.

రాష్ట్రంలో భారీ పెట్టుబడుల ఆశయాలకు అనుగుణంగా భవిష్యత్తులో 3.5 లక్షల ఎకరాల భూమి అవసరమని అధికారులు అంచనా వేస్తున్నారు. రాయలసీమలో పునరుత్పాదక ఇంధన ప్రాజెక్టుల కోసం 2.55 లక్షల ఎకరాలు సేకరిస్తుండగా, మిగిలిన లక్ష ఎకరాలతో ల్యాండ్ బ్యాంకు సిద్ధం చేస్తారు.