షాబాద్ హత్యల కేసు నిందితుడి మృతదేహానికి పోలీసుల అంత్యక్రియలు

రంగారెడ్డి జిల్లా షాబాద్ మండలంలో ఆరుగురి హత్యల కేసు, పోక్సో కేసులో నిందితుడైన రాజ్‌కుమార్ మృతదేహానికి పోలీసులే అంత్యక్రియలు నిర్వహించారు.

పోస్టుమార్టం అనంతరం మృతదేహాన్ని స్వీకరించేందుకు కుటుంబ సభ్యులు, స్వగ్రామం ప్రజలు నిరాకరించారు. రాజ్‌కుమార్‌తో తమకు ఎలాంటి సంబంధం లేదని కుటుంబీకులు పోలీసులకు రాతపూర్వకంగా తెలియజేసి వెళ్లిపోయారు. గ్రామ పెద్దలు కూడా మృతదేహాన్ని గ్రామంలోకి రానివ్వబోమని స్పష్టం చేయడంతో, పోలీసులు చేవల స్మశాన వాటికలో అంత్యక్రియలు ముగించాల్సి వచ్చింది.

మరోవైపు, హత్యలకు ముందు రాజ్‌కుమార్ తన సెల్‌ఫోన్‌లో సెల్ఫీ వీడియో రికార్డు చేయడంతో పాటు బాండ్ పేపర్‌లపై నాలుగు పేజీల సూసైడ్ నోట్ రాశాడు. ఈ నెల 10వ తేదీన రాసిన ఆ లేఖలో, తనపై బ్లాక్‌మెయిల్, డబ్బుల డిమాండ్లు, బెదిరింపులు జరిగాయని ఆరోపించాడు. ఒక బాలిక కుటుంబ సభ్యులు తనను ఐదు లక్షలు, యాభై లక్షలు వరకు డిమాండ్ చేశారని, డబ్బులు ఇవ్వకపోతే రేప్ కేసు పెడతామని హెచ్చరించారని పేర్కొన్నాడు. మానసిక వేధింపులతో తాను బలవన్మరణానికి యత్నించినట్లు కూడా లేఖలో రాశాడు.

ఈ సూసైడ్ నోట్‌ను పోలీసులు స్వాధీనం చేసుకున్నారు. అయితే, ఇవి ఆరోపణలు మాత్రమేనని, నిజానిజాలు అధికారిక దర్యాప్తులోనే తేలాలని పోలీసులు వెల్లడించారు. ఈ ఘటనపై కేసు నమోదు చేసి దర్యాప్తు కొనసాగిస్తున్నట్లు తెలిపారు.