వటసావిత్రి వ్రతం నేడు జేష్ట అమావాస్య నాడు: పూజా విధానం, మౌడ్యమి నియమాలు

ఈరోజు జేష్ట అమావాస్య. ఇది మంగళవారంతో కలిసిరావడంతో భౌమ అమావాస్యగా పిలుస్తారు. స్కాంద పురాణ భవిష్యోత్తర పురాణం ప్రకారం, జేష్ట పౌర్ణమి నాడు చేసే వటసావిత్రి వ్రతాన్ని అమావాస్య రోజు కూడా నిర్వహించవచ్చు.

పూజా విధానం: మహిళలు సమీపంలోని మర్రి చెట్టు వద్దకు వెళ్లాలి. చెట్టు ముందు బియ్యపిండితో ముగ్గు వేయాలి. పసుపు, కుంకుమ, గంధం, పుష్పాలు ఉంచి దీపం వెలిగించాలి. పసుపు దారాన్ని చెట్టుకు కట్టి ప్రదక్షిణలు చేయాలి. దీనివల్ల భర్తకు అపమృత్యు దోషాలు తొలగి కుటుంబ సౌఖ్యం లభిస్తుందని నమ్మకం.

రాగి చెంబులో నీళ్లు తీసుకుని వదులుతూ 'అవైధవ్యంచ సౌభాగ్యం దేహిత్వం మమ సువ్రతే పుత్రాన్ పౌత్రాన్స్చ సౌఖ్యంచ గృహాణార్గ్యం నమోస్తుతే' అనే శ్లోకం చదవాలి. ఇది విశేష శుభ ఫలితాలనిస్తుందని భక్తులు విశ్వసిస్తారు.

ఇదే రోజు నుంచి గురు మౌడ్యమి ప్రారంభమవుతుంది. గురుగ్రహం సూర్యునికి దగ్గరై శక్తి కోల్పోవడంతో 30 రోజుల పాటు శుభ కార్యక్రమాలు నిర్వహించరాదు. వివాహాలు, గృహప్రవేశాలు, భూమి-వాహన కొనుగోళ్లు, అద్దె ఇల్లు మారడం వంటివి చేయకూడదు. అత్యవసరమైతే తర్వాత సత్యనారాయణ వ్రతం చేయాలి. అయితే ఈ సమయంలో జపాలు, దానాలు, ఆలయ దర్శనాలు చేయవచ్చు.

భౌమ అమావాస్య సందర్భంగా లక్ష్మీదేవికి జిల్లేడు వత్తులతో దీపారాధన, క్షీరాన్నం నైవేద్యం పెట్టడం వల్ల ఋణబాధలు తీరతాయని, రావలసిన ధనం సకాలంలో వస్తుందని విశ్వాసం.