పోలవరం: 2026 ఆగస్టు 14న ఎడమకాలువ నుంచి నీటి విడుదల, 2027 మార్చిలో ప్రాజెక్టు పూర్తి

ఏపీ ముఖ్యమంత్రి చంద్రబాబు నాయుడు పోలవరం ప్రాజెక్టు పనులను పరిశీలించారు. 2027 మార్చి నాటికి ప్రాజెక్టు మొత్తం పూర్తి చేస్తామని ప్రకటించారు.

అంతకుముందు, 2026 ఆగస్టు 14న పోలవరం ఎడమకాలువ ద్వారా గోదావరి నీటిని విడుదల చేయనున్నట్లు తెలిపారు. ఈ నీరు అనకాపల్లి జిల్లా మీదుగా విశాఖపట్నం జిల్లాకు అందుతుంది. స్వాతంత్ర్య దినోత్సవం ముందు రోజు నీటి విడుదల కార్యక్రమం నిర్వహిస్తామని, తాను అక్కడికి వెళ్లి నీటిని స్వాగతిస్తానని సీఎం చెప్పారు.

ఈ సందర్భంగా ఆయన ఇప్పటివరకు 37 సార్లు నేరుగా ప్రాజెక్టు సైట్ను సందర్శించినట్లు, 136 సార్లు సమీక్షలు నిర్వహించినట్లు తెలిపారు. పోలవరం ప్రాజెక్టు అథారిటీ (పీపీఏ), అంతర్జాతీయ నిపుణులు, సీడబల్యూపీఆర్ఎస్ సంస్థలు సమర్ధవంతంగా పనిచేస్తున్నాయని ప్రశంసించారు. కేంద్ర ప్రభుత్వం నిధులు విడుదల చేసి సహకరిస్తోందని కృతజ్ఞతలు తెలిపారు.

గత వైయస్ఆర్ కాంగ్రెస్ పార్టీ ప్రభుత్వం పోలవరం విషయంలో నిర్లక్ష్యం చేసిందని సీఎం ఆరోపించారు. ఆ సమయంలో పనులు నిలిచిపోవడంతో నిద్రలేని రాత్రులు గడిపామని గుర్తు చేశారు. ఈ విషయంపై వైయస్ఆర్ కాంగ్రెస్ పార్టీ స్పందన తెలియాల్సి ఉంది.

పోలవరం ప్రాజెక్టు గోదావరి నదిపై నిర్మించిన బహుళార్ధక జాతీయ ప్రాజెక్టు. ఇది ఉత్తరాంధ్ర, గోదావరి జిల్లాలకు సాగునీరు, తాగునీరు అందిస్తుంది.