తెలంగాణలో ఐదు రోజుల పాటు వర్షాలు.. 2, 3 తేదీల్లో భారీ వర్ష హెచ్చరిక

హైదరాబాద్ వాతావరణ కేంద్రం ప్రకారం రాష్ట్రంలో ఐదు రోజుల పాటు వర్షాలు కురిసే అవకాశం ఉంది. నవంబర్ 2, 3 తేదీల్లో భారీ వర్షాలు కురిసే అవకాశం ఉందని కేంద్రం తెలిపింది.

ఇవాళ ఉమ్మడి వరంగల్, ఖమ్మం జిల్లాల్లో ఉరుములు, మెరుపులతో కూడిన ఓ మోస్తరు వర్షం కురిసే అవకాశం ఉంది. ఉమ్మడి రంగారెడ్డి, హైదరాబాద్, సిద్దిపేట, యాదాద్రి భువనగిరి జిల్లాల్లోనూ మధ్యాహ్నం తర్వాత వర్షం పడే అవకాశం ఉంది. గంటకు 30 నుంచి 40 కిలోమీటర్ల వేగంతో ఈదురుగాలులు వీచే అవకాశం ఉందని వాతావరణ శాఖ తెలిపింది.

ఆర్నాబ్ తుఫాన్ ప్రభావంతో రాష్ట్రంలో వాతావరణం చల్లబడింది. తేమగాలులు అధికంగా ప్రవేశించాయి. ఈ ప్రభావంతో నిన్న భారీ వర్షం నమోదైంది.

నిన్న యాదాద్రి భువనగిరి జిల్లా వలిగొండ మండలంలో 11.6 సెం.మీ వర్షపాతం నమోదైంది. ఇది రాష్ట్రంలో అత్యధికం. మేడ్చల్ మల్కాజిగిరి జిల్లా కీసరలో 11.2 సెం.మీ వర్షపాతం నమోదైంది. కీసర పరిసర ప్రాంతాల్లో తాటి చెట్టుపై పిడుగు పడింది.

రేపటి నుంచి అల్పపీడనం ప్రభావంతో నవంబర్ 4 వరకు ఓ మోస్తరు వర్షాలు కురిసే అవకాశం ఉంది. 2, 3 తేదీల్లో ఉమ్మడి ఆదిలాబాద్, ఉమ్మడి మహబూబ్‌నగర్ జిల్లాల్లో భారీ వర్షాలు కురిసే అవకాశం ఉంది. ఈ జిల్లాలకు వాతావరణ శాఖ ఎల్లో హెచ్చరిక జారీ చేసింది. ఇక్కడ గంటకు 40 నుంచి 50 కిలోమీటర్ల వేగంతో ఈదురుగాలులు వీచే అవకాశం ఉంది.

ఉరుములు, మెరుపుల సమయంలో ప్రజలు అప్రమత్తంగా ఉండాలని వాతావరణ శాఖ హెచ్చరించింది. బయటకు రావద్దని, చెట్ల నీడన ఉండవద్దని సూచించింది. అల్పపీడనం ప్రభావం ఎలా ఉంటుందనేది నవంబర్ 2 తేదీకి స్పష్టమవుతుందని అధికారులు తెలిపారు.