మొక్కజొన్న, జొన్న కొనుగోలుకు తెలంగాణ ప్రభుత్వం ₹5,900 కోట్లు కేటాయింపు

తెలంగాణ ప్రభుత్వం మొక్కజొన్న మరియు జొన్న పంటల కొనుగోలుకు భారీగా నిధులు కేటాయించింది. రాష్ట్రంలో ఈ సీజన్‌లో భారీ దిగుబడులు వచ్చిన నేపథ్యంలో ఈ నిర్ణయం తీసుకున్నారు.

మొక్కజొన్న కొనుగోలుకు ఇప్పటికే ₹4,000 కోట్లు కేటాయించారు. దానికి అదనంగా మరో ₹1,800 కోట్లు విడుదల చేయనున్నారు. జొన్న కొనుగోలుకు ₹1,100 కోట్లతో ప్రణాళిక సిద్ధం చేసినట్లు వ్యవసాయ శాఖ మంత్రి తుమ్మల నాగేశ్వరరావు వెల్లడించారు.

రైతులకు ఇబ్బంది కలగకుండా ప్రభుత్వమే నేరుగా పంట కొనుగోలు చేపట్టాలని CM రేవంత్ రెడ్డి నిర్ణయించారు. ప్రభుత్వం రైతులకు పూర్తి మద్దతు అందిస్తామని స్పష్టం చేసింది.

ఉమ్మడి కరీంనగర్, ఆదిలాబాద్ జిల్లాల రైతులు ఎక్కువగా మొక్కజొన్న సాగు చేస్తారు. పంట కొనుగోలు జరగకపోవడంతో కొందరు రైతులు తీవ్ర ఆందోళనకు గురయ్యారని నివేదికలు వచ్చాయి.

ధాన్యం కొనుగోలుపై ఇంకా స్పష్టత రావాల్సి ఉంది. మిల్లర్లు సహకరించడం లేదని ప్రభుత్వానికి నివేదికలు అందినట్లు తెలుస్తోంది. ధాన్యం కొనుగోలు విషయంలో తెలంగాణ వ్యాప్తంగా రైతులు నిరీక్షిస్తున్నారు.

రైతు భరోసా పథకం కింద గత సీజన్ డబ్బులు ఇంకా రైతు ఖాతాల్లో జమ కాలేదు. రాబోయే ఖరీఫ్ సీజన్ కు సంబంధించి రైతు భరోసా నిధులు కేటాయించే ప్రణాళిక కూడా సిద్ధమవుతున్నట్లు సమాచారం.