మరో మూడు తెలంగాణ పబ్లిక్ స్కూళ్లను ప్రారంభించేందుకు ప్రభుత్వం సిద్ధం

తెలంగాణ ప్రభుత్వం తెలంగాణ పబ్లిక్ స్కూళ్లను (TPS) విస్తరిస్తోంది. ప్రస్తుతం పైలట్ ప్రాజెక్టులో భాగంగా మంచాల, పొల్కంపల్లి, వంగూరు పాఠశాలల నిర్మాణం దాదాపు పూర్తి అయింది. ఇప్పటికే ఆరుట్ల టీపీఎస్ పూర్తిగా ప్రారంభమైంది.

విద్యా కమిషన్ చైర్మన్ ఆకునూరు మురళి నేతృత్వంలో ఈ ప్రాజెక్టులు జరుగుతున్నాయి. వంగూరు టీపీఎస్‌ను డాక్టర్ చారకొండ వెంకటేష్, మంచాల టీపీఎస్‌ను జోష్నా శివారెడ్డి, పొల్కంపల్లి టీపీఎస్‌ను ప్రొఫెసర్ పీఎల్ విశ్వేశ్వరరావు నేరుగా పర్యవేక్షిస్తున్నారు. ప్రతి బుధవారం, శనివారం స్కూల్ మేనేజ్మెంట్ కమిటీ సమీక్ష సమావేశాలు నిర్వహిస్తూ నిర్మాణ పురోగతిని విశ్లేషిస్తున్నారు. స్కూల్ ప్రిన్సిపాల్ ఆధ్వర్యంలో పనుల విభజన పూర్తైంది.

ముఖ్యమంత్రి రేవంత్ రెడ్డి ఈ పైలట్ ప్రాజెక్ట్ కింద ఎంపిక చేసిన పాఠశాలల నిర్మాణాన్ని మూడు నెలల్లో పూర్తి చేయాలని విద్యా కమిషన్‌ను ఆదేశించారు. దీంతో అధికారులు యుద్ధ ప్రాతిపదికన పనులు చేపట్టారు. అన్ని మౌలిక సదుపాయాలతో ఈ పాఠశాలలను తీర్చిదిద్దేందుకు వేగంగా పనిచేస్తున్నారు.

పైలట్ ప్రాజెక్టు విజయవంతమైతే రాష్ట్రంలోని అన్ని జిల్లాలకు టీపీఎస్‌ను విస్తరించే యోచనలో ప్రభుత్వం ఉంది. ప్రభుత్వ పాఠశాలల్లో విద్యా నాణ్యతను మెరుగుపరచడమే లక్ష్యంగా ఈ ప్రాజెక్టును చేపట్టినట్లు విద్యా శాఖ వర్గాలు తెలిపాయి.