తెలంగాణలో భారీ వర్షాలు: ఖమ్మం సత్తుపల్లిలో 11 సెం.మీ. వర్షపాతం

బంగాళాఖాతంలో ఏర్పడిన వాయుగుండం ప్రభావంతో తెలంగాణలో గత రెండు రోజులుగా పలు జిల్లాల్లో భారీ వర్షాలు కురిశాయి. ఖమ్మం జిల్లా సత్తుపల్లిలో అత్యధికంగా 11 సెంటీమీటర్ల వర్షపాతం నమోదైంది.

ఖమ్మం జిల్లాలోనే వైరాలో 9, తల్లాడలో 8, మధిరలో 7 సెంటీమీటర్ల వర్షం కురిసింది. కొమరంబీం ఆసిఫాబాద్ జిల్లా జైనూర్లో, ములుగు జిల్లా వెంకటాపురంలో 7 సెంటీమీటర్ల చొప్పున వర్షపాతం నమోదైంది.

వాయుగుండం ఉత్తర దిశగా కదిలింది. దీంతో రాష్ట్రంపై వర్ష ప్రభావం తగ్గింది. వారం క్రితం 21 శాతంగా ఉన్న సగటు వర్షపాత లోటు 16 శాతానికి తగ్గింది. లోటు వర్షపాతం ఉన్న జిల్లాలు 18 నుంచి 14కు తగ్గాయి.

ఇవాళ, రేపు కొమరంబీం ఆసిఫాబాద్, జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం జిల్లాల్లో పలు చోట్ల భారీ వర్షాలు కురిసే అవకాశం ఉందని వాతావరణ శాఖ తెలిపింది.