భూ రీసర్వేను స్థానిక పరిస్థితులకు అనుగుణంగా మారుస్తాం: మంత్రి పొంగులేటి

సమగ్ర భూ రీసర్వే ప్రక్రియను స్థానిక పరిస్థితులకు అనుగుణంగా మార్పులు చేస్తామని రెవెన్యూ శాఖ మంత్రి పొంగులేటి శ్రీనివాస్ రెడ్డి తెలిపారు. సర్వేలో ఎదురవుతున్న ఇబ్బందులకు ఆచరణాత్మక పరిష్కారాలు చూపిస్తామని ఆయన అన్నారు.

సచివాలయం నుంచి కలెక్టర్లు, అదనపు కలెక్టర్లు, ఆర్డీఓలు, సర్వే అధికారులతో మంత్రి వీడియో కాన్ఫరెన్స్ నిర్వహించారు. రీసర్వే, హౌసింగ్ అంశాలపై ఈ సమావేశంలో చర్చ జరిగింది. క్షేత్ర స్థాయి అధికారుల అనుభవాలు, సూచనల ఆధారంగా మార్పులు చేస్తామని మంత్రి తెలిపారు.

రీసర్వే ప్రక్రియను కలెక్టర్లు నిరంతరం పర్యవేక్షించాలని పొంగులేటి ఆదేశించారు. భూ యజమానులకు సందేహాలు, అపోహలు లేకుండా సర్వేపై పూర్తి సమాచారం అందించాలని సూచించారు.

నల్గొండ, ఖమ్మం జిల్లా కలెక్టర్లను మంత్రి అభినందించారు. నిజామాబాద్ జిల్లాలో రీసర్వే పురోగతిపై అసంతృప్తి వ్యక్తం చేశారు. పనితీరు మెరుగుపరచుకుని నిర్దేశిత లక్ష్యాలకు అనుగుణంగా సర్వేను వేగవంతం చేయాలని ఆదేశించారు.

ఇందిరమ్మ టవర్స్ కోసం భూములు గుర్తించాలని కలెక్టర్లను మంత్రి కోరారు. రెండు పడక గదుల ఇళ్ల నిర్మాణం లబ్దిదారుల ఎంపికపై దృష్టి సారించాలని ఆదేశించారు.