TPCC విచారణకు మంత్రి దామోదర గైర్హాజరు.. కాంగ్రెస్‌లో చర్చ

జుక్కల ఎమ్మెల్యే లక్ష్మీకాంతరావుతో ఏర్పడిన వివాదంపై టీపీసీసీ పిలిచిన విచారణకు మంత్రి దామోదర రాజనరసింహ హాజరుకాలేదు. ఇద్దరి మధ్య జరిగిన పంచాయతీ అంశంపై విచారణ చేపట్టాలని టీపీసీసీ నిర్ణయించింది.

విచారణ కోసం ఇద్దరు నాయకులను గాంధీభవన్‌కు రావాలని టీపీసీసీ ఆదేశించింది. మంత్రికి ఉదయం 11:30 గంటలకు, ఎమ్మెల్యేకు మధ్యాహ్నం 12:30 గంటలకు సమయం ఇచ్చారు. టీపీసీసీ అధ్యక్షుడు మహేష్ గౌడ 11:30కి గాంధీభవన్‌కు చేరుకున్నారు.

మొదట తాను విచారణకు వస్తానని మంత్రి అంగీకరించినట్లు పార్టీ వర్గాలు చెప్తున్నాయి. తర్వాత రావడం లేదని ఆయన గాంధీభవన్‌కు సమాచారం ఇచ్చారు. మధ్యాహ్నం 3 గంటలకు క్యాబినెట్ సమావేశం ఉందని, ఆరోగ్యం సహకరించడం లేదని ఆయన కారణాలు చెప్పినట్లు తెలుస్తోంది.

టీపీసీసీ అధ్యక్షుడు మంత్రిని ఫోన్‌లో సంప్రదించినట్లు సన్నిహిత వర్గాలు తెలిపాయి. కనీసం 5-10 నిమిషాలైనా గాంధీభవన్‌కు రావాలని ఆయన కోరినట్లు చెప్తున్నారు. దాదాపు రెండు గంటలకు పైగా టీపీసీసీ అధ్యక్షుడు మంత్రి రాక కోసం ఎదురుచూశారు.

మంత్రి తర్వాతే తాను రావాలని షెడ్యూల్ ఉండటంతో ఎమ్మెల్యే లక్ష్మీకాంతరావు కూడా వేచి ఉన్నారు. పార్టీలో ఎవరైనా పార్టీ లైన్ పాటించాలని, క్రమశిక్షణ ఉల్లంఘిస్తే కఠిన చర్యలు తీసుకుంటామని టీపీసీసీ ఇదివరకే ఒక ప్రెస్ నోట్ జారీ చేసింది. మంత్రి గైర్హాజరుపై కాంగ్రెస్ వర్గాల్లో చర్చ జరుగుతోంది. మంత్రి నుంచి ఇంకా అధికారిక సమాచారం రాలేదు.