VBG రామ్‌జీ చట్టంపై తెలంగాణ సబ్‌కమిటీ అభ్యంతరాలు; జూలై 2న కేబినెట్ నిర్ణయం

తెలంగాణ మంత్రి ఉత్తమ్‌కుమార్‌రెడ్డి అధ్యక్షతన కేబినెట్ సబ్‌కమిటీ VBG రామ్‌జీ చట్టం 2025 పై సమావేశమైంది. ఈ చట్టం వల్ల గ్రామీణ ఉపాధి హామీ పథకం బలహీనపడుతుందని, రాష్ట్రాల హక్కులకు భంగం కలుగుతుందని సబ్‌కమిటీ గట్టి అభ్యంతరం వ్యక్తం చేసింది.

పథకం నిధుల్లో 40% భారాన్ని రాష్ట్రాలపై మోపడం అప్రజాస్వామికమని, సహకార సమాఖ్య స్ఫూర్తికి విరుద్ధంగా కేంద్రం ఏకపక్షంగా వ్యవహరిస్తోందని కమిటీ విమర్శించింది. పన్నుల రూపంలో కేంద్రానికి వెళ్లే రూపాయికి తెలంగాణకు తిరిగి కేవలం 40 పైసలు మాత్రమే వస్తున్న నేపథ్యంలో ఈ అదనపు భారం ఆమోదయోగ్యం కాదని స్పష్టం చేసింది.

చట్టంలో ప్రతిపాదించిన 60 రోజుల ఉపాధి విరామం కూలీలకు ఉపాధి అవకాశాలను తగ్గించి గ్రామీణ ఆర్థిక వ్యవస్థ దెబ్బతీస్తుందని కమిటీ ఆందోళన వ్యక్తం చేసింది. గ్రామీణ పేదలకు 200 రోజుల ఉపాధి కల్పించాలని డిమాండ్ చేసింది.

అవసరమైతే కర్ణాటక, కేరళ రాష్ట్రాలతో కలిసి కేంద్ర ప్రభుత్వ నిర్ణయాన్ని సవాల్ చేస్తామని, సుప్రీంకోర్టుకు వెళ్లే అవకాశమూ ఉందని సబ్‌కమిటీ తెలిపింది. VBG రామ్‌జీ చట్టం అమలుపై తుది నిర్ణయాన్ని జూలై 2న జరిగే రాష్ట్ర కేబినెట్ సమావేశంలో తీసుకుంటామని ప్రకటించింది.