తెలంగాణకు భారీ వర్ష హెచ్చరిక: పలు జిల్లాలకు ఎల్లో, ఆరెంజ్ అలర్ట్

బంగాళాఖాతంలో ఏర్పడిన అల్పపీడనం కారణంగా తెలంగాణలో రాబోయే రోజుల్లో భారీ నుంచి అతిభారీ వర్షాలు కురిసే అవకాశం ఉంది.

వాతావరణ శాఖ అధికారులు ఈ మేరకు హెచ్చరిక జారీ చేశారు. పలు జిల్లాలకు ఎల్లో, ఆరెంజ్ అలర్ట్లు ప్రకటించారు. గాలులు గంటకు 40-50 కిలోమీటర్ల వేగంతో వీచే అవకాశం ఉన్నందున ప్రజలు అప్రమత్తంగా ఉండాలన్నారు.

రేపటి రోజు ఆదిలాబాద్, కొమరంభీం ఆసిఫాబాద్, మంచిర్యాల, పెద్దపల్లి, జగిత్యాల, నిర్మల్, నిజామాబాద్, జయశంకర్ భూపాలపల్లి జిల్లాల్లో భారీ వర్షం పడే అవకాశం ఉండటంతో ఆ జిల్లాలకు ఆరెంజ్ అలర్ట్ జారీ చేశారు. ములుగు, భద్రాద్రి కొత్తగూడెం, మహబూబాబాద్, కరీంనగర్, రాజన్న సిరిసిల్ల, కామారెడ్డి, మెదక్ జిల్లాల్లో ఎల్లో అలర్ట్ కొనసాగుతుంది.

గత ఏడాదితో పోలిస్తే ప్రస్తుతం 10-15% వర్షపాతం లోటు నమోదైందని వాతావరణ శాఖ తెలిపింది. జూలై, ఆగస్టు నెలల వర్షాలపై ఈ ఏడాది మొత్తం వార్షిక వర్షపాతం ఆధారపడి ఉంటుందని అధికారులు సూచించారు.

రైతులకు కొన్ని సూచనలు చేశారు. తక్కువ నీటి లభ్యతతో పండే పంటలు ఎంచుకోవాలన్నారు. వర్షపు నీటిని ఇంకుడు గుంతలు, వాటర్ ట్యాంకులు, చెరువులు, రిజర్వాయర్లలో నిల్వ చేసుకోవాలని సలహా ఇచ్చారు. ప్రతి నీటి చుక్కను విలువైనదిగా భావించి నిల్వ చేసుకుంటే, భవిష్యత్తులో పొడి వాతావరణం వచ్చినా పెద్దగా ఇబ్బంది ఉండదని వెదర్ నిపుణులు వివరించారు.

ఏడు రోజుల మీడియం రేంజ్ ఫోర్కాస్ట్ ప్రకారం, ముందు మూడు రోజులు వర్షాలు కురిసిన తర్వాత వాతావరణం మళ్లీ పొడిగా మారే అవకాశం ఉందని అధికారులు తెలిపారు. ఎల్నినో ప్రభావంతో ఉత్తర తెలంగాణలో అధిక వర్షాలు, దక్షిణ మధ్య తెలంగాణలో లోటు వర్షపాతం కనిపిస్తోంది.