ఎల్ నినో ప్రభావం: తెలంగాణ యాసంగి సాగు 2 లక్షల ఎకరాలకే పరిమితం

ఎల్ నినో ప్రభావంతో తెలంగాణలో ఈ యాసంగి సాగు ఆశించిన స్థాయిలో ప్రారంభం కాలేదు. ఇప్పటివరకు 2 లక్షల ఎకరాల్లో మాత్రమే పంటలు వేశారు. సాధారణంగా యాసంగిలో రాష్ట్రంలో 73.71 లక్షల ఎకరాల్లో సాగు జరుగుతుంది.

వర్షాభావ పరిస్థితులు, చెరువుల్లో తగ్గిన నీటి నిల్వలు, బావుల్లో పడిపోతున్న భూగర్భ జలాలే ఇందుకు కారణం. నీటి లభ్యతపై స్పష్టత లేక రైతులు సాగుపై నిర్ణయం తీసుకోలేక వేచి చూస్తున్నారు.

వరి సాగు ఇంకా ప్రారంభమే కాలేదు. సాధారణంగా వరి 54.33 లక్షల ఎకరాల్లో సాగవుతుంది. వరి నాట్లకు పంట చేతికి వచ్చే వరకు నిరంతరం నీరు అవసరం. మధ్యలో నీటి కొరత వస్తే పెట్టుబడి నష్టం వస్తుందని రైతులు ఆలోచిస్తున్నారు. ప్రభుత్వం ఇప్పటికే వరి సాగు చేయొద్దని ప్రకటించింది.

ప్రస్తుతం సాగైన విస్తీర్ణంలో వేరుశనగ, పప్పు శనగ పంటలదే ఎక్కువ వాటా ఉంది. వేరుశనగ సాధారణ సాగు 2.60 లక్షల ఎకరాలు కాగా, ఇప్పటివరకు 66,000 ఎకరాల్లోనే సాగైంది. పప్పు శనగ ఈ సమయానికి 89,000 ఎకరాల్లో సాగుకావాల్సి ఉండగా, 44,000 ఎకరాలకే పరిమితమైంది. మొక్కజొన్న 28,000 ఎకరాల్లో వేశారు. పెద్దపల్లిలో 12,682 ఎకరాలు, ఖమ్మంలో 11,828 ఎకరాలు, జగిత్యాలలో 3,000 ఎకరాలు, కరీంనగర్లో 2,500 ఎకరాల్లో వేరుశనగ సాగైంది. పప్పు శనగ ఆదిలాబాద్‌లో 9,550 ఎకరాలు, కామారెడ్డిలో 8,156 ఎకరాలు, సంగారెడ్డిలో 7,836 ఎకరాలు, నిర్మల్‌లో 4,238 ఎకరాలు, గద్వాలలో 2,708 ఎకరాల్లో సాగైంది.

మెట్ట ప్రాంతాల్లో మొక్కజొన్న సాగు వైపు రైతులు మొగ్గు చూపే అవకాశం ఉందని వ్యవసాయ శాఖ అధికారులు అంచనా వేస్తున్నారు. ఆయకట్టు ప్రాంతాల్లో నీటి లభ్యత ఉంటే వరి సాగు జరిగే అవకాశం ఉందని కూడా అధికారులు భావిస్తున్నారు.