TFTDDA నూతన కార్యవర్గ సభ్యుల ప్రమాణ స్వీకారం

తెలుగు ఫిలిం అండ్ టీవీ డాన్సర్స్ అండ్ డాన్స్ డైరెక్టర్స్ అసోసియేషన్ (TFTDDA) ఉప ఎన్నికల్లో గెలిచిన కొత్త కార్యవర్గం ఈరోజు ప్రమాణ స్వీకారం చేసింది. అసోసియేషన్ కార్యాలయంలో జరిగిన కార్యక్రమంలో అధ్యక్షురాలు సుమలతా దేవి, వ్యవస్థాపకులు సోమరాజు, వెంకటేశ్వరరావు పాల్గొన్నారు.

కొత్తగా ఎన్నికైన పదాధికారుల్లో బాలకృష్ణ (ప్రధాన కార్యదర్శి), పిట్ట ఇజ్రాయెల్ అలియాస్ తడివేలు (కోశాధికారి), జి. శంకర్ (ఉపాధ్యక్షుడు), పులి నాగమల్లేశ్వరరావు (జాయింట్ సెక్రటరీ), జి. రవితేజ (ఆర్గనైజింగ్ సెక్రటరీ) ఉన్నారు. బి. కన్నయ్య, ఎం. రమేష్, బి. వెంకన్న, ఎం. రాములు కమిటీ సభ్యులుగా, నిరంజని ఈసీ సభ్యురాలిగా ప్రమాణం చేశారు.

ఈ సందర్భంగా నూతన కమిటీ కీలక ప్రకటనలు చేసింది. నటుడు చిరంజీవి, నటుడు రామ్ చరణ్‌ల నుంచి రూ.40 లక్షల చొప్పున సాయం లభించిందని, రామ్ చరణ్ చేతుల మీదుగా త్వరలో సభ్యులందరికీ ఆరోగ్య బీమా అందజేస్తామని తెలిపారు. అలాగే, తాము ఫెడరేషన్‌కు గానీ, చిరంజీవికి గానీ వ్యతిరేకం కాదని స్పష్టం చేశారు.

అసోసియేషన్‌లో ఏకత్వం కొనసాగించాలని, అవినీతికి పాల్పడిన వారిపై చర్యలు తీసుకుంటామని, ప్రతి సభ్యునికి న్యాయం చేస్తామని నూతన పదాధికారులు పేర్కొన్నారు. ఫెడరేషన్ తో కలిసి పనిచేస్తామని, సభ్యుల స్వేచ్ఛకు భంగం కలగకుండా చూస్తామని హామీ ఇచ్చారు.