టీజీఎస్పీడీసీఎల్ విద్యుత్ సరఫరాకు డిజిటల్ మ్యాపింగ్, వేగవంతమైన సేవలే లక్ష్యం

టీజీఎస్పీడీసీఎల్ రాష్ట్రంలో విద్యుత్ సరఫరా వ్యవస్థను పూర్తిగా డిజిటల్ రూపంలోకి మార్చడానికి నెట్వర్క్ మ్యాపింగ్ డ్రైవ్ ప్రారంభించింది. తొలిదశలో కోర్ అర్బన్ రీజియన్ ఎకానమీ పరిధిలో దీన్ని అమలు చేశారు. వినియోగదారులకు వేగవంతమైన, నాణ్యమైన సేవలు అందించడమే లక్ష్యమని అధికారులు తెలిపారు.

ఈహెచ్టీ సబ్‌స్టేషన్ నుండి ప్రతి ఇంటికి విద్యుత్ సరఫరా వివరాలను డిజిటల్ మ్యాపింగ్ లో చూడవచ్చు. 33కేవి ఫీడర్లు, 11కేవి ఫీడర్లు, డిస్ట్రిబ్యూషన్ ట్రాన్స్‌ఫార్మర్లు, సర్వీస్ కనెక్షన్ల మధ్య అనుసంధానాన్ని ఒకే వేదికపై నమోదు చేస్తామన్నారు. ప్రస్తుత లోపాలను తొలగించి మరింత సమర్థవంతమైన వ్యవస్థను రూపొందిస్తున్నామని తెలిపారు.

ఫీల్డ్ ఇంజనీర్లు, మీటర్ రీడర్లు క్షేత్ర స్థాయిలో సర్వే చేసి, ప్రతి డిస్ట్రిబ్యూషన్ ట్రాన్స్‌ఫార్మర్‌కు అనుసంధానమైన వినియోగదారుల వివరాలు నమోదు చేశారు. దీనివల్ల ఖచ్చితత్వం పెరిగి నిర్వహణ సులభతరం అవుతుందని అధికారులు చెప్పారు. విద్యుత్ అంతరాయాల సమస్యలను వేగంగా గుర్తించే అవకాశం ఉందని టీజీఎస్పీడీసీఎల్ సీఎండీ జితేష్ వీ పాటిల్ అన్నారు.

జూలై నెలలో డీటీఆర్ మ్యాపింగ్, నెట్వర్క్ మ్యాపింగ్ పూర్తి చేయబోతున్నారు. ప్రస్తుతం ట్రాన్స్‌ఫార్మర్ మ్యాపింగ్ కొనసాగుతోంది. గత జూన్‌లో ‘వాక్ ది లైన్’ కార్యక్రమం ద్వారా అధికారులు ఫిజికల్‌గా లైన్లపై నడిచి పర్యవేక్షించారు. ట్రాన్స్‌ఫార్మర్ నుండి వినియోగదారుల లింక్‌ను ఎలా రూపొందించాలో ప్రణాళిక సిద్ధమైంది.

1912 కాల్‌సెంటర్, వాట్సాప్, వెబ్‌పోర్టల్ ద్వారా ఫిర్యాదు వచ్చిన వెంటనే, సిస్టం ఫీడర్, డీటీఆర్ వివరాలను గుర్తించి సమస్య ఎక్కడుందో త్వరగా తెలుస్తుంది. ఈ నెలలో ప్రతి బిల్ ఇచ్చేటప్పుడు, వినియోగదారుడు ఏ ట్రాన్స్‌ఫార్మర్‌కు లింక్ అయ్యారో సిబ్బంది సిస్టం‌లో నమోదు చేస్తారు.

కొత్త విధానం వల్ల ట్రాన్స్‌ఫార్మర్‌పై లోడ్ ఎక్కువైతే కెపాసిటీ పెంచడం, విద్యుత్ అంతరాయం సంభవించినప్పుడు వెంటనే గుర్తించి మరమ్మతులు చేయడం సాధ్యమవుతుంది. అడ్వాన్స్‌డ్ డిజిటల్ ప్లాట్‌ఫామ్ స్మార్ట్ గ్రిడ్, ఆర్టిఫిషియల్ ఇంటెలిజెన్స్ ఆధారిత లోడ్ మేనేజ్‌మెంట్, ప్రిడిక్టివ్ మెయింటెనెన్స్ వంటి సౌకర్యాలకు బలమైన పునాది కల్పిస్తుందని జితేష్ వీ పాటిల్ తెలిపారు. అన్ని ట్రాన్స్‌ఫార్మర్లను అత్యున్నత స్థితికి తీసుకురావడం, లాజిక్ ఆధారిత స్పందనతో వినియోగదారులకు సమాచారం అందించడం తదుపరి లక్ష్యం. జూలై నెలాఖరు వరకు సంపూర్ణ నెట్వర్క్ మ్యాపింగ్, వినియోగదారు-ట్రాన్స్‌ఫార్మర్ మ్యాపింగ్ సాధించాలని అధికారులు భావిస్తున్నారు.