పార్లమెంటు వాయిదాలపై శశిథరూర్ నిరాశ, సంభాషణల కొరతపై ఆందోళన

పార్లమెంటు ఉభయ సభలు వరుసగా వాయిదా పడుతుండటంపై కాంగ్రెస్ ఎంపీ శశిథరూర్ నిరాశ వ్యక్తం చేశారు. ప్రభుత్వం, ప్రతిపక్షం మధ్య సంభాషణలు లేకపోవడం ఈ పరిస్థితికి కారణమని ఆయన పేర్కొన్నారు. పార్లమెంటు అనేది ప్రతిపక్షాలకు అతిపెద్ద ఆస్తి అని, అక్కడ మంత్రులను ప్రశ్నించే అవకాశం, నియోజకవర్గ సమస్యలు, జాతీయ అంశాలను లేవనెత్తే వేదిక అని ఆయన వివరించారు. చట్టాలపై చర్చ జరగకుండా ఆమోదం పొందితే, భవిష్యత్తులో న్యాయస్థానాల్లో కూడా దాని ఉద్దేశ్యాన్ని అర్థం చేసుకోవడం కష్టమవుతుందని శశిథరూర్ అన్నారు. గతంలో ఒక కేసులో న్యాయమూర్తి, 'బిల్లు చర్చ లేకుండా పార్లమెంటులో ఆమోదమైతే దాని ఉద్దేశ్యం తెలియదు' అని వ్యాఖ్యానించిన ఉదంతాన్ని ఆయన గుర్తు చేశారు. కాబట్టి ప్రభుత్వానికి మెజారిటీ ఉన్నా సభలో చర్చ జరిగి అభిప్రాయాలు రికార్డు కావాలని, అది న్యాయవ్యవస్థకు కూడా విలువైనదని ఆయన అభిప్రాయపడ్డారు. ప్రభుత్వం తన బిల్లులు ఆమోదింపజేసుకోవడానికి ప్రతిపక్షంతో చర్చించాల్సిన అవసరం ఉన్నా అది జరగడం లేదని ఆయన విమర్శించారు. తనకు అధికారంలో ఉన్నప్పుడు పార్లమెంటరీ వ్యవహారాల మంత్రి ప్రతిపక్ష నేతలను సంప్రదించి సభ సజావుగా సాగేలా చేసేవారని, ప్రస్తుతం అలాంటి సమన్వయం కనిపించడం లేదని శశిథరూర్ తెలిపారు. ఈ పరిస్థితి పార్లమెంటు ప్రజాస్వామ్య ఆరోగ్యానికి మంచిది కాదని ఆయన హెచ్చరించారు.