కేపీహెచ్‌బీ కాలనీలో శ్రీ వెంకటేశ్వరస్వామి ఆలయంలో తొలి ఏకాదశి ఉత్సవాలు

కేపీహెచ్‌బీ కాలనీలోని శ్రీ పద్మావతి సమేత శ్రీ వెంకటేశ్వరస్వామి ఆలయంలో తొలి ఏకాదశి వేడుకలు ఘనంగా జరిగాయి. తెల్లవారుజాము నుంచే భక్తులు పెద్ద సంఖ్యలో తరలివచ్చి స్వామివారిని దర్శించుకున్నారు.

అర్చకులు శ్రీ భాను శర్మ, ఆలయ కమిటీ అధ్యక్షులు శ్యామల రాజు ఆధ్వర్యంలో స్వామివారికి ప్రత్యేక పూజలు, అభిషేకాలు నిర్వహించారు. స్వామి అమ్మవార్లను సువర్ణ ఆభరణాలతో సర్వాంగ సుందరంగా అలంకరించారు. ఆలయ ప్రాంగణం భక్తులతో కిటకిటలాడింది.

ఈ తొలి ఏకాదశినే శయన ఏకాదశి లేదా దేవశయని ఏకాదశి అనీ పిలుస్తారు. ఈ రోజు నుంచి స్వామివారు యోగనిద్రలోకి వెళతారని, నాలుగు నెలల చాతుర్మాస్య దీక్ష ప్రారంభమవుతుందని భక్తుల నమ్మకం. ఈ సందర్భంగా భక్తులు ఆరోగ్యం, సకాలంలో వర్షాలు, పంటలు బాగా పండాలని ప్రత్యేక ప్రార్థనలు చేశారు.