ఏలూరు జిల్లాలో పెద్దపులి సంచారం: ఆవుపై దాడి, గ్రామస్థులు భయాందోళన

ఏలూరు జిల్లా వేలేరుపాడు మండలంలోని చింతలపాడు గ్రామంలో పెద్దపులి సంచారం ఆందోళన రేపింది. తెలంగాణలోని కావిడిగుండ్ల అటవీ ప్రాంతం నుంచి మంగళవారం రాత్రి సిద్దారం అడవిలోకి ప్రవేశించిన పులి, బుధవారం తెల్లవారుజామున చింతలపాడు సమీపంలో ఒక ఆవుపై దాడి చేసి చంపింది.

ఈ ఘటనతో గ్రామస్థులు తీవ్ర భయాందోళనకు గురయ్యారు. సమాచారం అందుకున్న అటవీ శాఖ అధికారులు ఘటనాస్థలానికి చేరుకుని పరిశీలించారు. పులికి అమర్చిన రేడియో కాలర్ సాయంతో దాని కదలికలను ఎప్పటికప్పుడు పర్యవేక్షిస్తున్నట్లు అధికారులు తెలిపారు. ప్రస్తుతం పులి ఎడవెళ్లి అటవీ ప్రాంతం వైపు వెళ్లినట్లు వారు వెల్లడించారు.

కట్కూరి విఆర్ఓ రాజేశ్వరరావు ప్రజలను అప్రమత్తంగా ఉండాలని, నిత్యవసరాలకు మాత్రమే బయటకు రావాలని కోరారు. ఏదైనా అనుమానాస్పద కదలిక కనిపిస్తే వెంటనే అటవీ శాఖ అధికారులకు సమాచారం ఇవ్వాలని విజ్ఞప్తి చేశారు.

గ్రామస్థులు మృత్యువాత పడిన పశువుకు నష్టపరిహారం డిమాండ్ చేశారు. తమ పిల్లలు పాఠశాలకు వెళ్లాలంటే అటవీ మార్గం గుండా వెళ్లాల్సి ఉంటుందని, పులి భయంతో అవస్థ పడుతున్నామని వారు ఆవేదన వ్యక్తం చేశారు. ప్రస్తుతం అధికారులు పరిస్థితిని నిరంతరం పర్యవేక్షిస్తూ అవసరమైన చర్యలు చేపడుతున్నారు.