AP జూనియర్ డాక్టర్లు ఈరోజు నుంచి పూర్తిస్థాయి సమ్మె; అత్యవసర సేవలు నిలిపివేత

ఆంధ్రప్రదేశ్‌లో జూనియర్ డాక్టర్లు ఈరోజు నుంచి పూర్తిస్థాయి సమ్మె ప్రారంభించారు. అత్యవసర వైద్య సేవలను కూడా నిలిపివేశారు. స్టైపెండ్ పెంపు సహా మూడు డిమాండ్లపై ఈ ఆందోళన కొనసాగుతోంది.

జూనియర్ డాక్టర్లు 15% స్టైపెండ్ పెంపు కోరుతున్నారు. ఈ మేరకు జనవరి 1, 2026 నుంచి స్టైపెండ్ సవరించాలని డిమాండ్ చేశారు. రిటైర్మెంట్ వయసును 65 ఏళ్లకు పెంచే ప్రతిపాదనను వ్యతిరేకిస్తున్నారు. NMC నిబంధనల ప్రకారం MSc, PhD అభ్యర్థులకు ప్రభుత్వ మెడికల్ కాలేజీల్లో ఉద్యోగాలు కల్పించాలని కోరుతున్నారు.

ఆర్థిక శాఖ 15% పెంపుకు విముఖత చూపింది. ఏటా క్రమంగా స్టైపెండ్ పెంచాలని ప్రతిపాదించింది. సమ్మె విరమించాలని ప్రభుత్వం విజ్ఞప్తి చేసింది. అత్యవసర సేవలు నిలిపివేయవద్దని డాక్టర్లకు సూచించింది.

వారం రోజులుగా నిరసన చేస్తున్నా ప్రభుత్వం నుంచి స్పందన లేదని డాక్టర్లు ఆగ్రహం వ్యక్తం చేశారు. ఆంధ్రప్రదేశ్ ద్రవ్యోల్బణం 6% ఉండగా, దేశ సగటు 5% ఉందని వారు చెప్పారు. అందుకే 15% పెంపు అవసరమని అంటున్నారు. జూనియర్ డాక్టర్లు 36 నుంచి 48 గంటల పాటు నిరంతరం డ్యూటీలు చేస్తున్నారని తెలిపారు.

ఈ సమ్మె కేవలం ఆంధ్ర మెడికల్ కాలేజీకే పరిమితం కాదని డాక్టర్లు తెలిపారు. రాష్ట్రవ్యాప్తంగా ప్రభుత్వ మెడికల్ కాలేజీల్లో జూనియర్ డాక్టర్లు పాల్గొంటున్నారు. ప్రభుత్వం ప్రత్యామ్నాయ ఏర్పాట్లు చేస్తోంది.