తిరుమలలో భక్తుల రద్దీ పెరిగింది, సర్వదర్శనానికి 15 గంటలు

తిరుమలలో భక్తుల రద్దీ భారీగా పెరిగింది. శ్రీవారి సర్వదర్శనానికి 15 నుంచి 20 గంటల సమయం పడుతోంది. ప్రత్యేక ప్రవేశ దర్శనానికి 5 గంటలు పడుతోంది.

వైకుంఠం కాంప్లెక్స్‌లోని 31 కంపార్ట్మెంట్లు భక్తులతో నిండిపోయాయి. క్యూ లైన్లలో భక్తులు కిలోమీటర్ల పాటు వేచి ఉన్నారు. గదులు, కాటేజీలు దొరక్క భక్తులు ఇబ్బందులు పడుతున్నారు.

నిన్న శ్రీవారిని 80,367 మంది భక్తులు దర్శించుకున్నారు. శ్రీవారి హుండీ ఆదాయం ₹3.34 కోట్లు వచ్చినట్లు సమాచారం.

దీపావళి సమీపిస్తుండటం, వారాంతపు సెలవులు కలవడం వల్ల రద్దీ పెరిగిందని TTD అంచనా వేస్తోంది. క్యూ లైన్లలో తోపులాట, తొక్కిడి జరగకుండా TTD ముందస్తు ఏర్పాట్లు చేసింది.

TTD చైర్మన్, ఈఓ క్యూ లైన్లను పరిశీలించారు. అన్నప్రసాదం, తాగునీరు సహా అవసరమైన సౌకర్యాలు కల్పించాలని అధికారులను ఆదేశించారు.

కమాండ్ కంట్రోల్ వ్యవస్థ ద్వారా భక్తుల రాకను ఎప్పటికప్పుడు పర్యవేక్షిస్తున్నారు. రేపటి వరకు ఈ రద్దీ కొనసాగే అవకాశం ఉంది.